Efast um að heimilt sé að reikna vexti á ósendar kröfur

Talsmaður neytenda efast um að bílalánafyrirtækjum sé heimilt að reikna vexti ofan á kröfur sem aldrei voru sendar til fólks. Þetta er eitt af tuttugu álitamálum sem hann telur vera við endurútreikning bílalána og segir að frumvarp viðskiptaráðherra eyði ekki óvissu fólks með bílalán.

Gísli Tryggvason, talsmaður neytenda, sat á fundi með tveimur þingnefndum í morgun, ásamt fleirum, til að fara yfir álitamál sem uppi eru vegna endurútreikninga bílalána.

Fjöldi fólks hefur haft samband við Gísla og kvartað undan þessum endurútreikningum, þá hefur fólk haft samband við fréttastofu og furðað sig á að því meðal annars að banki geti reiknað vexti að fullu fyrir þann tíma sem beðið var niðurstöðu dómstóla - og sendu því ekki rukkanir.

Löngu boðað frumvarp Árna Páls Árnasonar, viðskiptaráðherra, til að slá á óvissu um gengistryggð lán eftir dóma Hæstaréttar í sumar, er nú komið fram og felur í sér að öll gengistryggð bíla- og fasteignalán verði talin í sama flokki. Gísli telur þó að það eyði ekki óvissunni um endurútreikninga lánanna.