Lykilstjórnendur fá hundruð milljóna í vasann

Lykilstjórnendur Eimskipafélagsins fá kauprétt að hlut í félaginu sem nemur þremur og hálfu prósenti af heildarhlutafé félagsins. Virði þess hlutar hleypur a.m.k. á hundruðum milljóna króna, en til stendur að skrá félagið á markað síðar á þessu ári.

Undirbúningur vegna skráningar Eimskipafélagsins á markað hefurstaðið yfir undanfarin misseri, stefnt er á að félagið verið skráð á markað í septembermánuði.

Virði félagsins, miðað við þá útreikninga sem hluthafar í félaginu hafa fengið kynningu á, samkvæmt heimildum fréttastofu, nemur á bilinu 25,2 til 39,2 milljörðum króna, allt eftir því hvaða margfaldi er notaður hverju sinni.

Hluturinn sem lykilstjórnendur félagsins munu hafa rétt á því að kaupa, samkvæmt þeim upplýsingum sem fram koma í ársreikningi félagsins fyrir árið 2011, er ríflega eins milljarðs króna virði samkvæmt miðað við miðgildi þess verðbils sem notast hefur verið við í undirbúningi skráningarinnar. Ekki er útlistað nákvæmlega í reikningnum hvaða stjórnendur það eru sem fá munu kauprétt á hlutum í félaginu.

Ómögulegt er að segja með vissu hvers virði um 3,5 prósent hlutur í félaginu verður þegar það verður skráð á markað. Rekstur félagsins hefur tekið miklum stakkaskiptum eftir endurskipulagningu á rekstrinum í kjölfar hrunsins, og var eiginfjárhlutfall í lok fyrsta ársfjórðungs þessa árs ríflega 62 prósent, og rekstrarhagnaðurinn ríflega einn milljarður króna.