Dagamunur skýrir minni áfengissölu

Velta í dagvöruverslun dróst saman um 0,4 prósent, reiknað á föstu verðlagi, í september miðað við sama mánuð í fyrra, samkvæmt tölum Rannsóknaseturs verslunarinnar á Bifröst.

Í tilkynningu Rannsóknaseturs kemur fram að þegar leiðrétt hafi verið fyrir árstíðabundnum þáttum hafi velta dagvöruverslana í september raunar aukist um 2,1 prósent. Þá kemur fram að verð á dagvöru hafi hækkað um 3,9 prósent á síðastliðnum 12 mánuðum.

„Sala áfengis dróst saman um 10,1 prósent í september miðað við sama mánuð í fyrra á föstu verðlagi," segir í umfjöllun Rannsóknaseturs, en áfengisverð var 4,2 prósentum hærra en í september í fyrra.

Um leið er áréttað að í samanburði á veltu dagvöru og áfengis á milli ára hafi dagamunur nokkur áhrif. „Í fyrra voru fimm föstudagar í september en á þessu ári fjórir," segir í umfjölluninni og bent er á að föstudagar séu langsöluhæstu vikudagarnir. „Þannig varð samdráttur í sölu á mat og drykk í september síðastliðnum á föstu verðlagi, en þegar leiðrétt hefur verið fyrir þessum föstudags-dagamun kemur í ljós lítilsháttar raunaukning." - óká