„Pína eða sjálfsagt framlag?“

Félag viðskiptafræðinga og hagfræðinga standa fyrir hádegisverðarfundi um skattlagningu í ferðaþjónustu á Grand Hótel á morgun klukkan 12. Titill fundarins er „Pína eða sjálfsagt framlag? Skattlagning í ferðaþjónustu“.

Í tilkynningu frá félaginu segir að ferðamannaiðnaðurinn sé einn mest vaxandi iðnaður landsins og orðinn stærsta einstaka atvinnugrein landsins. Skattlagning á atvinnugreinina í formi virðisaukaskatts hafi verið mikið til umræðu og er breytinga að vænta í þeim efnum. Á fundinum verði reynt að svara því hvaða áhrif þessar breytingar munu hafa á ferðaþjónustuna og einstakar greinar innan hennar.

Á fundinum taka til máls Bjarni Benediktsson, fjármála- og efnahagsráðherra, Jón Bjarni Steinsson og Árni Sverrir Hafsteinsson, höfundar skýrslu um skattaumhverfi í ferðaþjónustu og Rannveig Grétarsdóttir, framkvæmdastjóri Eldingar. Fundarstjóri verður Auðbjörg Ólafsdóttir sérfræðingur í fjárfestatengslum hjá Marel og stjórnarkona í FVH.

Nánari upplýsingar hér.