Telur tónlist vinna gegn depurð heilabilaðra

„Nám í listkennslu við Listaháskólann getur leitt mann á ýmsar slóðir. Það veitir fólki rétt til að verða kennarar á sínu listasviði í grunnskóla og framhaldsskóla en þó ég hafi unnið mikið með ungu fólki gegn um tíðina hef ég í dag meiri áhuga á að vinna með eldri borgurum,“ segir Magnea Tómasdóttir söngkona.

Hún er að útskrifast úr meistaranámi frá listkennsludeildinni og er ein þeirra sem ætla að kynna það í dag klukkan 16.30 á Laugarnesvegi 91.

 „Það sem ég er að sérhæfa mig í er tónlistariðkun með fólki með Alz­heimer og aðrar tegundir heilabilunar,“ segir Magnea.

„Mamma greindist 61 árs gömul með heilabilun og lifði í 12 ár, svo greindist pabbi með Alzheimer og hann dó fyrir hálfu ári. Við notuðum tónlist mikið í umönnun þeirra beggja. Meistararitgerð mín spratt dálítið út frá því, enda snerist líf mitt um þau í 20 ár.“

 Magnea segir tónlistarhlustun og tónlistariðkun geta verið ákjósanlegan part af umönnun heilabilaðra. Hún auki lífsgæði þeirra, minnki depurð og auki virkni.

„Í gegnum tónlistina sést oft í manneskjuna bak við sjúkdóminn,“ fullyrðir hún.

Hugmyndir eru uppi um að Listaháskólinn fari af stað með námskeið til að þjálfa tónlistarfólk í að sinna svona störfum, að sögn Magneu. Hún hefur áhuga á að fara til London og kynna sér aðferðir Englendinga, enda segir hún þá framarlega á þessu sviði, er þegar búin að fara út og komast að því. 

Magnea ætlar að lýsa náminu í listkennsludeildinni óformlega í dag niðri í Laugarnesi og svara fyrirspurnum.

„Það sem er svo gott við þessa deild er að þar mætist listafólk úr hinum ýmsu greinum, tónlist, sviðslistum og sjónlistum, þannig að maður fær innsýn í svo margt. Það er lærdómsríkt.“