Rikka með nýja sýn á lífið eftir hjólreiðaslys á Spáni

Friðrika Hjördís Geirsdóttir, betur þekkt sem Rikka, telur að hjálmurinn hafi bjargað því að ekki fór verr þegar hún lenti í reiðhjólaslysi á Spáni fyrir rúmum mánuði. Hún segist hafa lært að vera æðrulaus á þeim mánuði sem liðinn er frá slysinu og fundið meiri styrk en áður.

Rikka greinir frá slysinu á bloggsíðu sinni en hún skellti sér í hópferð til Suður-Spánar ásamt vinkonu sinni Kolbrúnu Björnsdóttur og fleirum. Þar átti að hjóla daglega í sól og blíðu í góðum félagsskap

Fyrsta daginn hjóluðu þau 40 kílómetra og ákváðu að daginn eftir yrði 100 kílómetra múrinn rofinn.

„Þetta var metnaðarfullt markmið, sérstaklega þar sem sumir í hópnum höfðu varla hjólað lengra en út innkeyrsluna heima hjá sér.“

Dagurinn gekk vel framan af og voru þau búin að hjóla um 70 kílómetra í fallegu veðri þegar slysið varð.

„Þegar ég var svo að renna mér niður þessa yndislegu brekku fann ég allt í einu högg, heyrði loftið renna úr framdekkinu og svo man ég ekki meir. Ég rankaði við mér á götunni, hálftilfinningalaus. Ég sá allt svart en rankaði svo við mér og datt úr til skiptis,“ lýsir Rikka.

Hjálmurinn til bjargar

„Ég heyrði Kollu mína kalla á mig með kökkinn í hálsinum. Ég fann ekki fyrir neinu. Ég vil nú ekki dramatisera neitt því á þessari stundu var augljóst að ég var ekki brotin. Ég var nú samt flutt í sjúkrabíl á næstu heilsugæslustöð þar sem gert var að helstu sárum. Síðan var ég send heim á hótel.“

Rikka segir að henni hafi liðið nokkuð vel þegar hún kom upp á hótel þótt vönkuð væri. Svo hafi lærin farið að bólgna upp en hún bitið á jaxlinn, klætt sig upp og farið í kvöldmat með ferðafélögunum.

„Fljótlega fór mér svo að svima og verða flökurt sem endaði á því að ég kastaði upp á mig alla og fína Diane Von Furstenberg kjólinn minn. Mikið óskaplega var þetta allt saman glæsilegt. Ég var send aftur upp á spítala þar sem ég hafði augljóslega fengið heilahrissting. Þar var ég næturlangt og er í rauninni búin að vera að jafna mig síðan. Ég þurfti að láta tappa blóð af Hematomu á lærinu á mér og var svolítin tíma að jafna mig eftir heilahrisstinginn,“ segir Rikka. Hún leggur áherslu á að hún sé heil og vogi sér ekki að kvarta.

„Ég vil samt segja við ykkur öll að hjálmurinn bjargaði mér, ef ég hefði ekki verið með hann þá væri ég ekki hér. Þó að ég hafi misst af ýmsu þennan mánuð þá er heilsan númer eitt.“