Fleiri samningar og hærra verð á fasteignamarkaði

Fjöldi þinglýstra kaupsamninga á höfuðborgarsvæðinu 3. desember til og með 9. desember var 81. Þetta er nokkuð meiri fjöldi samninga en nemur meðaltali síðustu 12 vikna sem er 70 samningar á viku.

Þetta kemur fram á vefsíðu Þjóðskrár Íslands. Þar segir að af þessum 81 samningi voru 56 samningar um eignir í fjölbýli, 19 samningar um sérbýli og 6 samningar um annars konar eignir en íbúðarhúsnæði.

Heildarveltan var 2.641 milljón króna og meðalupphæð á samning 32 milljónir króna. Þetta eru mun hærri upphæðir en nema meðaltali síðustu 12 vikna. Heildarveltan hefur verið tæpir 2 milljarðar á viku að meðaltali og upphæð á samning 27 milljónir kr. að meðaltali.

Á sama tíma var 8 kaupsamningum þinglýst á Suðurnesjum. Þar af voru 4 samningar um eignir í fjölbýli, 3 samningar um sérbýli og 1 samningur um annars konar eignir en íbúðarhúsnæði. Heildarveltan var 121 milljón króna og meðalupphæð á samning 15 milljónir króna.

Á sama tíma var 5 kaupsamningum þinglýst á Akureyri. Þar af var 1 samningur um eignir í fjölbýli og 4 samningar um sérbýli. Heildarveltan var 163 milljónir króna og meðalupphæð á samning 32 milljónir króna.

Á sama tíma var 1 kaupsamningi þinglýst á Árborgarsvæðinu. Hann var um eign í fjölbýli. Upphæð samnings var 10 milljónir króna.