Nýir eigendur og stjórn hjá Advania

Hluthafafundur Advania fór fram í dag þar sem kjörin var ný stjórn og nýir eigendur, AdvInvest eignuðust 57 prósent í fyrirtækinu.

Framtakssjóður Íslands sem áður átti 71 prósent á nú 32 prósent og aðrir aðilar eiga því um 9.5 prósent í fyrirtækinu. Alþjóðlegir fagfjárfestar hafa því eignast tæplega 57 prósent hlut í Advania.

Eiginfjárhlutfall félagsins var þá einnig aukið í 22,5 prósent en markmið að skrá félagið á markað á Íslandi og í Svíþjóð. Þetta kemur fram í tilkynningu frá félaginu.



Thomas Ivarson sem fer fyrir fjárfestingafélaginu AdvInvest tekur við af Finnboga Jónssyni sem stjórnarformaður félagsins. Thomas hefur reynslu úr heimi upplýsingatækninnar en undanfarna þrjá áratugi hefur hann leitt alþjóðleg upplýsingatæknifyrirtæki á borð við CMG, Logica, WM Data og CGI.

„Advania er öflugt upplýsingafyrirtæki sem hefur náð eftirtekarverðum árangri sem vakti athygli okkar á fyrirtækinu og gerir það að góðum fjárfestingarkosti. Þá er staðsetning fyrirtækisins á Íslandi mikill styrkur, meðal annars vegna legur landsins og mikils framboðs á vel menntuðu og reynslumiklu starfsfólki”, segir Thomas Ivarson.

Auk Thomas Ivarson taka þau Birgitta Stymne Göransson og Bengt Engström sæti í stjórn Advania fyrir AdvInvest. Birgitta hefur reynslu á sviði heilbrigðismála og upplýsingatækni í Svíþjóð.

Bengt hefur einnig reynslu úr heimi upplýsingatækninnar og hefur meðal annars verið forstjóri Fujitsu og ráðgjafi hjá BearingPoint. Auk þeirra eiga þau Katrín Olga Jóhannesdóttir og Kristinn Pálmason sæti í stjón. Varamenn eru Sampo Salonen, Rebekka Jóelsdóttir og Katarina Burton sem áður sat í aðalstjórn.