Ásta Dís hættir hjá Fríhöfninni

Ásta Dís Óladóttir hefur tekið þá ákvörðun að hætta störfum hjá Fríhöfninni á Keflavíkurflugvelli. Tilkynning um þetta barst starfsmönnum Fríhafnarinnar fyrr í dag. Þetta kemur fram í frétt Víkurfrétta.

Í fréttinni segir að í tölvupósti til starfsmanna sem barst í dag séu Ástu Dís þakkað fyrir vel unnin störf hjá félaginu og henni óskað velfarnaðar á nýjum vettvangi. Segir að Ásta Dís muni láta af störfum næsta miðvikudag, en fljótlega eftir helgi verði tilkynnt hver muni tímabundið gegna stöðu framkvæmdastjóra þar til búið er að ráða í stöðuna.

Ásta Dís tók við stöðu framkvæmdastjóra Fríhafnarinnar árið 2010. Hún er með meistaragráðu í stjórnun og stefnumótun og doktorspróf í alþjóðlegum viðskiptum frá Viðskiptaháskólanum í Kaupmannahöfn. Hún starfaði þar áður við Háskólann á Bifröst sem dósent í viðskiptafræði, forstöðumaður rannsóknaseturs um alþjóðleg viðskipti og forseti Viðskiptadeildar.