Telja markaðsvirði Össurar of hátt og uppgjör valda vonbrigðum

Capacent telur að rekstur stoðtækjaframleiðandans Össurar sé góður og hafi skilað fjárfestum góðum arði. Hins vegar sé verð félagsins á markaði of hátt.

Samkvæmt nýju verðmati Capacent, sem Fréttablaðið hefur undir höndum, er Össur metinn á 1.525 milljónir dala sem jafngildir 158,6 milljörðum króna og verðmatsgenginu 369 krónur á hlut. Gengi bréfa í félaginu var 470 krónur þegar verðmatið var gert, 2. ágúst, og er matið því um 21 prósenti undir markaðsgengi.

Greinendur Capacent telja uppgjör Össurar á fyrstu sex mánuðum ársins hafa valdið vonbrigðum. Þeir benda á að rekstraráætlun félagsins hafi verið endurskoðuð. Nú geri félagið ráð fyrir að EBITDA-hlutfallið verði átján til nítján prósent, en ekki nítján til tuttugu prósent eins og áður. Þá hafi innri vöxtur Össurar á Ameríkumarkaði verið lítill eða eitt prósent, líklega vegna aukinnar samkeppni, sér í lagi í framleiðslu stuðningsvara. Benda þeir á að sala stuðningsvara hafi dregist saman nær samfellt frá árinu 2014.

Þeir taka þó fram að rekstur Össurar hafi verið sterkur og EBITDA-hlutfallið hátt eða um nítján prósent að meðaltali á árunum 2010 til 2016. Gerir Capacent ráð fyrir að hlutfallið verði komið í 20,1 prósent á næsta ári og 20,8 prósent árið 2021. Auk þess er gert ráð fyrir um 7,5 prósenta tekjuvexti á þessu ári en á næstu árum er spáð 5,1 prósents tekjuvexti sem endurspeglar hagvöxt og verðbólgu á helstu markaðssvæðum Össurar.

Greinendur Capacent segja að framlegðin sé há á markaðinum fyrir framleiðslu stoð- og stuðningstækja. Því sé líklegt að fleiri vilji „komast að veisluborðinu“. Telur Capacent því að helstu áskoranirnar í rekstri Össurar til framtíðar tengist vaxandi samkeppni.