Innlent

Jónína Benediktsdóttir er látin

Kolbeinn Tumi Daðason skrifar
Jónína Ben var afar litríkur karakter og áberandi í íslensku þjóðlífi í lengri tíma.
Jónína Ben var afar litríkur karakter og áberandi í íslensku þjóðlífi í lengri tíma. Vísir

Jónína Benediktsdóttir íþróttafræðingur og frumkvöðull er látin 63 ára að aldri. Hún varð bráðkvödd að heimili sínu í Hveragerði. Þetta kemur fram í tilkynningu frá aðstandendum. Jónína fæddist á Akureyri þann 26. mars 1957 en ólst upp á Húsavík. Hún lætur eftir sig þrjú börn og fjögur barnabörn.

Jónína var aðeins unglingur þegar hún gekk í Bahaisöfnuðinn en þar kynntist hún Sveini Eyjólfi Magnússyni sem var fimm árum eldri. Þau gengu í hjónaband þegar Jónína var sautján ára og héldu þau til náms í Kanada.

Í Kanada nam Jónína íþróttafræði og starfaði í líkamsræktarstöð. Þau Sveinn skildu og sneri Jónína aftur til Íslands snemma á níunda áratugnum.

Jónína varð snemma áberandi í íslensku þjóðlífi og gerði garðinn frægan fyrst á Íslandi eftir heimkomuna sem frumkvöðull í líkamsrækt. Hún var með heilsuþætti bæði í útvarpi og sjónvarpi. Morgunleikfimi hennar í Ríkisútvarpinu naut meðal annars mikilla vinsælda.

Hún giftist Stefáni Einari Matthíassyni lækni og eignaðist með honum þrjú börn. Þá stofnaði hún „Stúdíó Jónínu og Ágústu“ með Ágústu Johnson sem naut mikilla vinsælda. Þau Stefán Einar fluttu til Svíþjóðar 1989 þar sem Jónína rak líkamsræktarstöð og seldi svo með miklum hagnaði þegar þau Stefán fluttu aftur heim árið 1997.

Planet Pulse á Hótel Esju

Við heimkomuna stofnaði Jónína Planet Pulse á Hótel Esju og meðal viðskiptavina var Jóhannes Jónsson sem kenndur var við Bónus. Fór svo að þau Jónína og Jóhannes skildu bæði og hófu sambúð.

Umfjöllun Frjálsrar verslunar um Jónínu og Planet Pulse árið 1997.

Í ævisögu Jónínu Ben sem Sölvi Tryggvason ritaði kom fram að Jónína hefði fjárfest óspart í líkamsræktarstöðvum sem urðu fimm talsins. Hún lenti aftur á móti í miklum fjárhagserfiðleikum. Upp úr slitnaði hjá Jónínu og Jóhannesi og ekki í góðu.

Varð Jónína óbeinn þátttakandi í svonefndu Baugsmáli þar sem viðskiptamaðurinn Jón Gerald Sullenberger kærði Jón Ásgeir. Tölvupóstar á milli Jónínu, Styrmis Gunnarssonar ritstjóra Morgunblaðsins og Jóns Geralds urðu eins konar hliðarmál við sakamál sem rekið var fyrir dómstólum. Leiddi málið til dóms yfir Jóni Ásgeiri.

Árin í Póllandi 

Jónína og Gunnar Þorsteinsson, kenndur við trúfélagið Krossinn, byrjuðu að slá sér upp árið 2010 og gengu þau í það heilaga við látlausa en fallega athöfn sama ár.

Jónína daðraði við stjórnmálin og bauð meðal annars fram krafta sína fyrir Framsóknarflokkinn. Hún vann í átján ár við rekstur heilsuhótels í Póllandi þangað sem Íslendingar héldu í detox-meðferðir.

Þjóðþekktir einstaklingar voru þeirra á meðal eins og fjallað var um í Fréttablaðinu árið 2009.

Gunnar og Jónína ákváðu í fyrra að fara hvort í sína áttina en héldu þó góðu sambandi. 

Jónína ræddi gamla tíma og nýja við Völu Matthíasdóttur í Íslandi í dag í haust. Meðal annars um heilsumeðferðir hér á landi á Hótel Örk í Hveragerði.

Margt líkt með nöfnunum

Það er óhætt að segja að Jónína hafi látið í sér heyra og ekki legið á skoðunum sínum í gegnum árin. Í þættinum Segðu mér á Rás 1 í september sagðist Jónína hafa erft ýmsa eiginleika ömmu sinnar og nöfnu, Jónínu Jónsdóttur.

„Hún sagði sínar skoðanir umbúðalaust og kom miklu af stað. Hún eignaðist ekkert endilega fullt af vinum en þeir vinir sem hún átti var fólk sem stóð í lappirnar. Nú er húsið hennar á Akureyri heimili fyrir konur sem eru beittar heimilisofbeldi,“ sagði Jónína.

Amma hennar hafi aldrei kvartað og það geri hún heldur ekki.

Óhrædd við að sýna sárin

„Ég er ekki kvörtunargjörn. Ég veð í verkefnin. Sumir halda kannski að ég sé að kvarta og kveina en sannleikurinn gerir mann frjálsan. Það er mín trú. Þeir sem sýna ekki sárin sín eru miklu frekar að kvarta, bara á bak við tjöldin,“ sagði Jónína. 

Hún sýni sárin líkt og Jesú Kristur.

Meðal sáranna voru vandræði með áfengi og svefnlyf sem Jónína ræddi opinskátt. Hún byrjaði seint að neyta áfengis en hún hafði alltaf haft varann á vegna þess að alkóhólisma hafði verið að finna í fjölskyldunni.

„Það er ekki fyrr en börnin mín fara að heiman og ég orðin ein, búin að lenda í ólgusjó, missa fyrirtækið mitt í hendur óreiðumanna, og allt tekið af mér, æran og mannorðið, þá komst ég að því einn daginn að rauðvín höfðaði vel til mín.“

Þurfum ekki að taka ábyrgð á öllu 

Jónína sagði hjúkrunarfræðinga hafa verið meðal þeirra sem leituðu til hennar í heilsumeðferð, uppgefnir eftir að hafa gengið upp að öxlum fyrir þjóðina. Hún tengi við kulnun sem hún hafi sjálf lent í þegar hún vann í Póllandi. Kulnunaraldan síðustu ár geti kennt fólki eitthvað.

„Við eigum ekki að vinna meira en svona sex tíma á dag. Það er nóg. Við þurfum ekki að taka ábyrgð á öllu í kringum okkur. Ég er hætt að ímynda mér það, að ef páfinn verður óléttur, að ég hafi barnað hann.“

Jónína ræddi um kulnunina og þau áföll sem hún varð fyrir í lífinu í Bítinu á Bylgjunni árið 2018. 

„Ég er bara mannleg og þetta eru búin að vera svo stór áföll hjá mér,“ sagði Jónína í viðtalinu.

Jónína lætur eftir sig þrjú uppkomin börn, Jóhönnu Klöru, Tómas Helga og Matthías sem eru öll börn Stefáns Einars Matthíassonar. Barnabörnin eru fjögur, Stefán Kári, Kristín Embla, Ásdís Þóra og Matthías Þór.


Tengdar fréttir

Með Jóni Páli þegar hann fékk dauða­dóminn

Jónína Benediktsdóttir hefur oft verið umdeild hér á landi. Hún var ung orðin viðskiptakona í Svíþjóð, þar sem hún fékk alls kyns verðlaun fyrir frumkvöðlastarfsemi sína í líkamsrækt og rekstri líkamsræktarstöðva.

Bumbur minnka og minnka í Hveragerði

Í Hveragerðisbæ hefur heilsa og líðan íbúa verið í fyrirrúmi og um leið hefur stuðningur við menningar-, íþrótta- og frístundahópa verið liður í að byggja upp öruggari starfsvettvang þessara hópa.




Fleiri fréttir

Sjá meira


×