Viðskipti erlent

Senda teymi til að sækja MAX-vélarnar úr eyðimörkinni

Tryggvi Páll Tryggvason skrifar
Það styttist í að þessar flugvélar fái að fara í loftið á ný.
Það styttist í að þessar flugvélar fái að fara í loftið á ný. Getty/Mario Tama

Bandaríska flugfélagið Southwest Airlines hefur sent teymi flugvirkja í eyðimörkina við Victorville í Kaliforníu þar sem flugfélagið geymir 34 af Boeing 737 MAX-flugvélum sínum.

Flugvélarnar hafa verið geymdar þar þar sem loftslagið í eyðimörkinni er talið henta einna best til þess að lágmarka það tjón sem getur orðið þegar flugvélar eru geymdar til lengri tíma án reglulegrar notkunar. Flugmálayfirvöld í Bandaríkjunum gáfu í gær grænt ljós á það að MAX-vélarnar fái að fara í loftið á ný, eftir tæplega tveggja ára flugbann vegna tveggja mannskæðra flugslysa.

Teymi frá Southwest hefur vaktað vélarnar frá því að þær voru sendar í geymslu og gætt þess að kveikja reglulega á lykilkerfum til þess að koma í veg fyrir skemmdir. Nýtt teymi flugvirkja hefur verið sent á staðinn til þess að undirbúa flugvélarnar undir notkun á ný, og til að innleiða þær breytingar sem flugmálayfirvöld í Bandaríkjunum hafa samþykkt að dugi til að heimila MAX-vélunum að fljúga um loftið á ný.

Flugmálayfirvöld þurfa að yfirfara vinnu flugvirkjanna og þegar það er gert verður flugvélunum flogið til helstu athafnasvæða flugfélagsins, þar sem frekari prófanir verða gerðar. Southwest reiknar ekki með að taka vélarnar í almenna notkun á ný fyrr en á öðrum ársfjórðungi næsta árs.

Á meðan munu átta þúsund flugmenn félagsins fá þjálfun vegna þeirra breytinga sem þarf að gera á flugvélunum.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×