Atvinnulíf

Covidþreytan í vinnunni og góð ráð

Rakel Sveinsdóttir skrifar
Það skiptir ekki máli við hvað við störfum, Covidþreytan er farin að reyna á.
Það skiptir ekki máli við hvað við störfum, Covidþreytan er farin að reyna á. Vísir/Getty

Covidþreyta er staðreynd og í raun eitthvað sem fæstir mótmæla að sé til staðar. Vinnustaðir þar á meðal enda reynir á að vinna í fjarvinnu eða við aðstæður nú þegar strangar sóttvarnarreglur gilda. Þá hefur félagslegi hlutinn breyst verulega síðustu mánuði, sem margir finna fyrir.

Vísbendingar um að þú sért að upplifa Covidþreytu og þér finnist hún vera farin að bitna á vinnunni þinni, eru t.d. eftirfarandi:

Minni afköst, verri einbeiting

Eitt af einkennum Covidþreytu getur komið fram í því að þér finnst þú ekki ná nógu góðum tökum á verkefnum eða vinnu. Skilvirknin er hreinlega minni og þér finnst erfiðara að halda einbeitingu á verkefnum. Fyrir vikið líður þér ekki vel og hefur á tilfinningunni að þú sért ekki að afkasta sem skyldi.

Styttri þráður

Í samkomubanninu í vor varstu kannski ekki að velta því neitt fyrir þér hvort sumir samstarfsfélagar kæmu oft of seint á fjarfundi eða að félagslegi hlutinn væri lítill sem enginn. Þeir sem voru starfandi heima náðu að tækla aðstæður ágætlega þótt maki og börn væru líka heima. Aðrir mættu til vinnu og unnu við stífar sóttvarnarreglur og fjarlægðarmörk sem gerði vinnuna erfiða fyrir alla en þó: Allir bara stóðu við sitt og þetta gekk ágætlega upp.

En allt í einu núna….. eru hreinlega ýmiss atriði farinn að fara í taugarnar á þér. Það gæti verið heima í fjarvinnunni eða við þær aðstæður sem verið er að vinna undir á vinnustöðunum. Já, kveikiþráðurinn er hreinlega orðinn styttri og þolmörkin minni fyrir ýmsum smáatriðum sem trufluðu þig ekki áður.

Meiri losarabragur 

Jafn algengt og það er að geyma stundum verkefni í vinnunni og rumpa þeim síðan af á síðustu stundu á það alls ekki við um alla. Margir telja sig þvert á móti vera mjög skipulagðir, eru með forgangsröðun verkefna á hreinu og finnst betra að vera með bæði skipulag og afköst alveg á tæru. 

Í dag upplifa hins vegar margir einhvern losarabrag á öllu. Eru oftar á síðustu stundum einfaldlega vegna þess að fólk kemur sér ekki af stað og stundum er hreinlega eins og einhver leti grípi fólk og fólk upplifir sig oftar þreytt.

Lífstíll úr skorðum, líka matur og svefn

Þá upplifa það margir að bæði matarræðið og svefn eru ekki í sömu rútínu og áður. Sumir eru að borða of mikið á meðan aðrir finna fyrir minni matarlyst. Margir eru að upplifa svefntruflanir eða breytingu á svefnvenjum. Sofa minna eða meira.

Eitt af einkennum Covidþreytunnar er að kveikiþráðurinn verður styttri.Vísir/Getty

En hvað er til ráða?

Heimurinn þarf að lifa við kórónufaraldurinn enn um sinn og þótt bóluefni sé í augsýn má gera ráð fyrir nokkuð löngum tíma í viðbót þar sem sóttvarnarreglur eru hertar eða á þeim slakað á víxl.

Hér eru nokkur góð ráð sem geta nýst til að sporna við einkennum Covidþreytunnar í vinnunni.

1. Verkefnalisti

Það er alltaf gott í vinnu að gera sér verkefnalista og læra hvernig best hentar að forgangsraða verkefnunum sínum. Hins vegar er þetta atriði meira áríðandi nú því verkefnalisti er eitt af því sem getur hjálpað til við að sporna gegn einkennum Covidþreytu.

2. Hreyfing í hálftíma

Og eins og þríeykið er alltaf að benda á: Hreyfing er mikilvæg. 

Þótt margir hafi slegið slöku við í hreyfingu síðustu mánuði en eru jafnvel „á leiðinni“ að fara að gera eitthvað, er gott að staldra við og taka hreinlega ákvörðun um að BYRJA. Hálftíma hreyfing á dag, t.d. göngutúr, æfingar heima eða annað. Til að sporna við Covidþreytu þurfum við að koma okkur af stiginu „að ætla bráðum að fara að gera eitthvað“ yfir í að framkvæma.

3. Skilgreindu áhyggjur og líðan

Oft upplifum við það að vera alveg búin á því án þess að vita nákvæmlega hvað það er sem er að þreyta okkur. Fréttirnar eru ekki beint upplífgandi þessa dagana og þótt bóluefni sé í sjónmáli veit enginn hvenær kórónufaraldurinn muni í raun taka enda.

Þegar við finnum til þreytu vegna ástandsins er gott ráð að skilgreina það svolítið hvernig okkur líður og átta okkur á því hvað virðist vera að plaga okkur. Jafnvel að styðjast við eftirfarandi fimm atriði:

Hvernig líður mér, hvaða hljóð heyri ég, hvað sé ég í kringum mig, bragða eða lykta?

Og þegar okkur finnst Covidþreytan yfirþyrmandi er líka hægt að gera einfalda hluti eins og að hlusta á góða tónlist, skvetta köldu vatni framan í sig eða skiptast á bröndurum með vini. Aðalmálið er að vera meðvitaður um að í því ástandi sem nú ríkir, þurfum við að hafa fyrir því að hressa okkur við.

Margir mæla líka með núvitund eða að þjálfa sig í öndun.

Sem einfalda öndunaræfingu má nefna 5-5-5 æfinguna. Hún felur það í sér að í 5 sekúndur dregur þú andann rólega inn. Síðan heldur þú andanum inni í 5 sekúndur og loks andar þú frá þér á 5 sekúndum.


Tengdar fréttir

Góð ráð fyrir verkefnalistann og forgangsröðun verkefna

Að gera góðan verkefnalista fyrir daginn getur létt á verkefnaálagi og áhyggjum eða því að gleyma að koma einhverju ákveðnu í verk. En hvernig gerum við listan og hvernig er best að forgangsraða verkefnum?

Úrvinda starfsmenn: Vísbendingar um að fólk eigi erfiðara með að höndla vinnuálag

Þótt fólk haldi að álag sé að aukast á vinnustöðum sýna mælingar á milli ára að fólk er ekki að meta álag í vinnunni meira en áður. Mun fleiri segjast þó vera úrvinda eftir vinnu og mjög þreyttir. Tómas Bjarnason sviðsstjóri mannauðsrannsókna og ráðgjafar hjá Gallup segir áreiti á fólk og tíðar breytingar nefndar til skýringar.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.