Heimsmarkmiðin

Ísland styður við skrifstofu mannréttindafulltrúa Sameinuðu þjóðanna

Heimsljós
OHCHR

Ísland hefur gert samkomulag við skrifstofu mannréttindafulltrúa Sameinuðu þjóðanna (OHCHR) um stuðning við starf hennar fyrir bættum mannréttindum í heiminum. Um er að ræða kjarnaframlag til skrifstofunnar fyrir árið 2020 og leggur grunn að frekara samstarfi Íslands við skrifstofuna á næstu árum. „OHCHR vinnur gríðarlega mikilvægt starf í þágu mannréttinda víða um heim og framlagið er í samræmi við aukna áherslu á mannréttindi í utanríkisstefnu og alþjóðlegri þróunarsamvinnu Íslands,“ segir Guðlaugur Þór Þórðarson utanríkis- og þróunarsamvinnuráðherra.

Haraldur Aspelund fastafulltrúi Íslands í Genf skrifar undir samninginn fyrir Íslands hönd.

Framlagið sem nú er samið um styrkir meðal annars neyðarstarf OHCHR en skrifstofan er hluti af snemmtæku viðvörunarkerfi Sameinuðu þjóðanna. Hlutverk hennar er að reyna að fyrirbyggja átök með því að beina kastljósinu að mannréttindabrotum sem oft eru undanfari átaka. Skrifstofan hefur einnig í auknum mæli beint kastljósinu að ofsóknum á grundvelli trúarbragða sem fara vaxandi. Framlagi Íslands er ætlað að styrkja starf skrifstofunnar í þeim efnum.

Ísland hefur að undanförnu beitt sér sérstaklega fyrir mannréttindum hinsegin fólks í þeim ríkjum heims þar sem þau eru fótum troðin. Ísland hefur meðal annars áður stutt sérstakt átak OHCHR, Free & Equal sem hefur það að markmiði að auka virðingu fyrir réttindum hinsegin fólks.

Íslenska framlagið styður starf skrifstofunnar sérstaklega þar sem kemur að skráningu mannréttindabrota gegn hinsegin fólki með það að augnamiði að safna upplýsingum sem síðan liggja til grundvallar málsvarastarfi Sameinuðu þjóðanna í þá átt að stuðla að breytingum á löggjöf sem og afstöðu almennings í tilteknum ríkjum.

Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.