Formúla 1

Schumacher þreytir frumraun sína á næstu vikum

Runólfur Trausti Þórhallsson skrifar
Mick Schumacher fær smjörþefinn af Formúlu 1 í næsta mánuði.
Mick Schumacher fær smjörþefinn af Formúlu 1 í næsta mánuði. Joe Portlock /Getty Images

Mick Schumacher – sonur Michael Schumacher – mun þreyta frumraun sína í Formúlu 1 kappakstrinum í næsta mánuði. 

BBC greindi frá.

Schumacher yngri verður hluti af teymi Alfa Romeo fyrir fyrir Eifel-kappaksturinn í Þýskalandi þann 9. október. Þar með fær Schumacher smjörþefinn af Formúlu 1 kappakstri þó aðeins sé um að ræða æfingar fyrir kappaksturinn sjálfan.

Þetta verður í fyrsta skipti sem Schumacher keyrir Formúlu 1 bíl en hann er sem stendur efstur í Formúlu 2. Þar keyrir hann fyrir Ferrari en talið er að hann keyri fyrir Alfa Romeo í Formúlu 1 á næstu leiktíð. Alfa Romeo er tengt Ferrari og því væri um hálfgerðan reynsluakstur að ræða.

Bretinn Callum Ilott fær að öllum líkindum einnig tækifæri í F1 á næsta ári en hann er í öðru sæti í Formúlu 2 sem stendur. Ilott myndi keyra fyrir Haas sem er einnig tengt Ferrari.

„Ég er mjög ánægður með að fá þetta tækifæri. Að mitt fyrsta skipti sem hluti af Formúlu 1 helgi verði fyrir framan heimafólk mitt í Nurburgring gerir þetta enn sérstakara. Ég ætla að nýta næstu tíu daga til þess að undirbúa mig eins vel og mögulegt er svo ég standi mig sem allra best,“ sagði Schumacher í viðtali við BBC.

Þó svo að Schumacher komist inn í hinn harða heim Formúlu 1 þá á hann töluvert í land með að ná karli föður sínum. Schumacher eldri varð meistari alls sjö sinnum frá 1994 til 2004. Hann vann 91 kappakstur á sínum ferli og skilaði sér 155 sinnum á verðlaunapall.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.