Innlent

Næstum 40 litlir skjálftar frá miðnætti

Stefán Ó. Jónsson skrifar
Frá Grindavík í upphafi árs, sem skýrir snjó í túnum.
Frá Grindavík í upphafi árs, sem skýrir snjó í túnum. vísir/egill

Rólegt hefur verið á skjálftasvæðinu í námunda við Grindavík þar sem hrina stendur yfir. Tæplega 40 skjálftar hafa mælst á svæðinu frá miðnætti en enginn hefur farið yfir þrjá frá því um sexleytið í gær. Mikil jarðskjálftavirkni hefur verið við Fagradalsfjall undanfarinn mánuð, en öflug jarðskjálftahrina hófst þar þann 19. júlí.

Ríflega 5000 skjálftar hafa mælst á svæðinu síðan þá.  Jarðvísindamenn Veðurstofunnar telja virknina líklega af völdum spennubreytinga vegna endurtekinna kvikuinnskota á Reykjanesskaga. Klukkan korter yfir fjögur í gær varð skjálfti af stærð 4,2 austast í Fagradalsfjalli um 10 km norðaustur af Grindavík. Annar skjálfti af stærð 3,7 varð á svipuðum slóðum á öðrum tímanum. 

Veðurstofunni bárust fleiri en hundrað tilkynningar um að skjálftanna hefði orðið vart víða á Suðvesturlandi. Skjálfti af stærðinni 3,3 mældist upp úr klukkan sex í gær, en síðan þá virðist hrinan aðeins í rénun.

Sem fyrr segir teljast skjálftarnir til hrinunnar sem hófst á svæðinu aðfaranótt 19. júlí. Stærsti skjálfti í hrinunni mældist síðar sama dag. Sá var að stærð 5,0 og fylgdu honum nokkrir snarpir eftirskjálftar og fundust þeir víða. Aðeins hefur þó dregið úr virkninni síðustu daga.

Gervihnattamyndir af svæðinu bera með sér skýr merki um yfirborðsbreytingar „sem samsvarar hér um bil 3 cm færslu um sprungu sem liggur í NA-SV rétt við Fagradalsfjall,“ eins og það er orðað á vef Veðurstofunnar.

Hrinan, sem nú er í gangi, er túlkuð sem hluti af lengri atburðarrás sem hófst á Reykjanesskaganum í enda árs 2019 og hefur náð allt frá Eldey fyrir vestan, og að Krýsuvík fyrir austan. Veðurstofan segir að þessi virkni, sem samanstendur bæði af jarðskjálfavirkni og mögulegum kvikuinnskotum, geti verið löng og kaflaskipt.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×