Leikjavísir

Dusty og FH Keppa til úrslita í League of Legends á Reykjavíkurleikunum

Samúel Karl Ólason skrifar
Dusty mætir FH í úrslitum Reykjavíkurleikanna, laugardaginn 1. febrúar klukkan 14:00.
Dusty mætir FH í úrslitum Reykjavíkurleikanna, laugardaginn 1. febrúar klukkan 14:00. RIG

Úrslitin ráðast á rafíþróttahluta Reykjavík International Games nú um helgina þar sem bestu rafíþróttamenn landsins mætast uppi á sviði í Háskólabíó til að fá úr því skorið hver fer með sigur af hólmi á stærsta rafíþróttaviðburði landsins. Í ár er keppt í þremur greinum, FIFA 20, League of Legends og Counter-Strike: Global Offensive og tóku yfir 250 manns þátt á leikunum.

Helgina 25. Og 26. janúar var undankeppnin spiluð í League of Legends. Alls mættu ellefu lið til leiks og spiluðu upp á hvaða lið mætast í úrslitum uppi á sviði í Háskólabíó laugardaginn 1. febrúar.

Í átta liða úrslitum ber helst að nefna leik KR og Fylkis. Fylkir hafði betur í fyrsta leik liðanna eftir að vera undir meirihluta leiksins. KR komu sterkir til baka og sigruðu næstu 2 leiki til að komast áfram í undanúrslit.

Í undanúrslitum mættust Dusty (sigurvegarar haust deildar Lenovo Deildarinnar 2019) og 4Þ1S (sigurvegarar haust deildarinnar í fyrstu deild 2019). Í fyrsta leik hafði Dusty yfirhöndina framanaf en seint í leiknum brást þeim bogalistin og 4Þ1S náðu að koma sér inn í leikinn aftur. Það dugði þó ekki og hafði Dusty betur í fyrsta leiknum. Í leik tvö hafði Dusty yfirhöndina allan tímann og sigraði hann örugglega. Í hinni viðureign dagsins mættust FH og KR. FH var í öðru sæti í haustdeild Lenovo Deildarinnar 2019 en KR í því þriðja. KR átti því harma að hefna frá því liðin mættust síðast. Eftir mjög jafna baráttu var FH þó skrefi á undan í báðum leikjunum og vann viðureignina frekar örugglega, 2-0.

Dusty mætir því FH í úrslitum Reykjavíkurleikanna, laugardaginn 1. febrúar klukkan 14:00. Liðin mættust síðast í úrslitum haustdeildar Lenovo Deildarinnar þar sem Dusty sigraði viðureignina 3-0. Eftir helgina er greinilegt að FHingar koma tvíefldir inn í þetta mót og ætla að sýna Dusty mönnum að þeirra tími á toppnum sé liðinn.

Hægt er að horfa á leiki undanúrslita á Twitch rás League of Legends lýsandans Siggó.

Hægt er að fylgjast með úrslitum í League of Legends í eigin persónu í Háskólabíó, laugardaginn 1. Febrúar og fer miðasala fram við hurð eða á tix.is

Hægt verður að fylgjast með beinni útsendingu frá úrslitum League of Legends á Vísi og á Twitch rás Rafíþróttasamtaka Íslands.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.