Samstaða í hópnum og fundi slitið með dynjandi lófaklappi

Þriðji fundur flugfreyja þar sem samninganefnd Flugfreyjufélags Íslands fer yfir stöðu mála og svarar spurningum félagsmanna stendur nú yfir á Hilton hóteli. Boðið var upp á fjóra fundi í dag svo allar flugfreyjur gætu sótt fundinn vegan samkomutakmarkana.

Fulltrúi fréttastofu sem var á Hilton á öðrum tímanum þegar fundi númer tvö lauk lýsti því hvernig honum hefði lokið með dynjandi lófaklappi.

Þær flugfreyjur sem fréttastofa hefur rætt við lýsa mikilli samstöðu hjá félaginu í viðræðunum við Icelandair. Í frétt Vísis fyrr í dag kom fram að ekki stæði til að ræða svokallað „lokatilboð“ Icelandair á fundinum í dag heldur yrði áherslan á tilboð flugfreyja til félagsins. Var vísað í svör fulltrúa samninganefndar í lokuðum hópi flugfreyja í gær.

Flugfreyjur sem fréttastofa hefur rætt við segja þó að spurningum varðandi tilboð Icelandair hafi verið svarað að einhverju leyti á fundunum í dag. Samningarnir eru þó flóknir og margar spurningar sem brenna á hópnum. Þá sé ekki hægt að fullyrða nákvæmlega um annað en það sem viðkomandi flugfreyja heyrði á þeim fundi sem hún sótti.

Guðlaug Líney Jóhannsdóttir, formaður Flugfreyjufélags Íslands, tjáði fulltrúa fréttastofu eftir hádegið í dag að þótt enginn fundur væri boðaður í deilunni væri samninganefndin á fullu við vinnu sína.

Síðasti fundur flugfreyja á Hilton Nordica-hótelinu hefst klukkan 16 í dag. Á sama tíma hefst hluthafafundur Icelandair á sama stað í öðrum sal.