Ráðherra vill meiri launahækkun til kvennastétta en annarra

Þorsteinn Víglundsson jafnréttismálaráðherra vill hækka laun kvennastétta meira en annarra stétta í næstu kjarasamningaviðræðum sem eru handan við hornið.

Þórunn Sveinbjarnardóttir, formaður BHM, er áfram um þá hugmynd.

Konur eru að meðaltali með 13 prósent lægri laun en karlar. Að mati Þorsteins bera fjölmargar kvennastéttir mikla ábyrgð í erfiðum störfum sem krefjast langrar menntunar.

„Hér erum við að tala um fjölmenna hópa á borð við grunn- og leikskólakennara, hjúkrunarfræðinga og svo mætti áfram telja. Tilraunir til að leiðrétta einstaka hópa hafa iðulega leitt af sér sömu launakröfur hjá öðrum stéttum,“ segir Þorsteinn.

„Það er gott að ráðherrann komi fram með þessa hugmynd og vert að ræða alvarlega. Sautján aðildarfélög BHM eru með lausa samninga við ríkið og þar innan um eru kvennastéttir sem þarf að leiðrétta. Hafa ber í huga að þær kvennastéttir sem þurfa leiðréttingu launa sinna eru háskólamenntaðar stéttir,“ segir Þórunn. „Ég hef viðrað álíka hugmyndir áður við SALEK-borðið en þær hugmyndir hlutu ekki náð þá.“

Þórunn segir tímasetningu þessara hugmynda ekki koma á óvart. „Þótt þessar hugmyndir dúkki upp nú, augljóslega í ljósi komandi kosninga, er samt vert að ræða þær af alvöru og vonandi er vilji til þess að hækka laun kvennastétta í þessu landi,“ segir Þórunn.

„Eina leiðin til að hægt verði að leiðrétta kjör þessara stétta er víðtæk sátt allrar verkalýðshreyfingarinnar og ríkis og sveitarfélaga,“ segir Þorsteinn og vill beita sér fyrir því að eyða kynbundnum launamun á íslenskum vinnumarkaði. „Greina verður hver þessi launamunur er og á grunni slíkrar greiningar að semja um hvernig hann verði lagfærður án þess að aðrir hópar innan verkalýðshreyfingarinnar geri kröfu um sömu hækkanir.“