Hæstiréttur sýknaði Marel af kröfum Glitnis

Hæstiréttur Íslands sýknaði í gær Marel af kröfum Glitnis en málið snérist um ágreining um uppgjörsaðferð tiltekinna afleiðusamninga árið 2006.

Í tilkynningu til Kauphallarinnar segir að eftir fall Glitnis í október 2008 leituðu forsvarsmenn Marel eftir því við skilanefnd bankans að samningarnir héldu gildi sínu til umsaminnar lokadagsetningar, sem var í febrúar 2012.

Glitnir sá sér hins vegar ekki fært að inna skyldur sínar af hendi samkvæmt samningnum gagnvart Marel og gerðu aðilarnir með sér samkomulag um uppgjör og slit samninganna þann 5. maí 2009. Greiddi Marel Glitni í tengslum við samkomulagið samtals 20 milljónir evra, eða um 3,2 milljarða kr. á grundvelli svokallaðrar uppsöfnunaraðferðar.

Glitnir taldi hins vegar að beita ætti svokallaðri núvirðisaðferð við uppgjörið og krafði Marel um tæplega fjórar milljónir evra til viðbótar. Marelsmenn voru ósammála þar sem Glitnir vanefndi skyldur sínar og ætti ekki að hagnast á umræddri vanefnd. Því fór málið fyrir dóm og vann Marel bæði í héraði sem og í Hæstarétti.