AGS: Útlitið er gott en hættur framundan á Íslandi

Alþjóðagjaldeyrissjóðurinn (AGS) segir að útlitið sé gott í efnahagsmálum Íslands en hættur séu framundan. Þetta kemur fram í yfirlýsingu frá sjóðnum í tengslum við aðra úttekt hans á stöðu landsins eftir að áætlun AGS og Íslands um endurreisn landsins lauk.

AGS nefnir jákvæða hluti eins og að hagvöxtur sé ágætur og muni verða það áfram til meðallangs tíma, dregið hafi úr atvinnuleysi og að þótt verðbólgan sé yfir markmiði Seðlabankans muni hún nálgast það markmið til meðallangs tíma. Þá nefnir sjóðurinn að skuldir hins opinbera séu á niðurleið og staða fjármálamarkaðarins sé að batna.

Hvað hætturnar framundan varðar segir sjóðurinn að þær felist einkum í því að kreppan á evrusvæðinu gæti versnað enn og að óljóst sé hvenær gjaldeyrishöftunum verði aflétt. Sérstaklega er fjallað um gjaldeyrishöftin í yfirlýsingu AGS og þar segir m.a. ef höftunum verður aflétt áður en nauðsynlegt skilyrði eru til staðar muni það valda gengishruni krónunnar, auknum skuldum einkageirans og mikilli verðbólgu.

AGS segir áætlun um afléttingu haftanna verði að vera velskipulögð og varfærin. Stöðugleiki í ríkisfjármálum og verulegur afgangur á viðskiptajöfnuði verði að vera til staðar ásamt aðgangi að alþjóðlegum fjármálamörkuðum.

AGS fjallar einnig um verðbólguna og segir að herða verði á peningastefnunni til að ná verðbólgunni niður, það er hækka stýrivexti.