Kaupþing stóð rangt að innköllun krafna

Kaupþingi var óheimilt að fella niður fimmtán milljóna evra, eða 2,4 milljarða króna, kröfu Irish Anglo bank á hendur Kaupþingi, samkvæmt tilskipun EES. Þetta er niðurstaða EFTA dómstólsins sem gaf álit sitt á málinu í dag. Málið snýst um það að Kaupþing lýsti eftir kröfum í nokkrum dagblöðum á Evrópska efnahagssvæðinu, í Stjórnartíðindum ESB og á vefsíðu sinni eftir hrun bankans. Þar voru kröfuhafar beðnir um að lýsa kröfum innan sex mánaða.

Kaupþing hafnaði svo kröfu Anglo Irish Bank, sem nú heitir Irish Bank Resolution Corporation, með þeim rökum að tölvupóstur sem Anglo Irish Bank sendi í lok október 2008 gæti ekki talist kröfulýsing í skilningi laga um gjaldþrotaskipti og laga um fjármálafyrirtæki. Taldi bankinn að fullnægjandi kröfulýsing frá Anglo Irish bank hefði borist of seint. Ekki náðist samkomulag um kröfuna á kröfuhafafundi og því ákvað Anglo Irish Bank að stefna Kaupþingi á þeim rökum að ekki hafi verið fullnægjandi að innkalla kröfulýsingar með auglýsingum í dagblöðum. Telur bankinn að hann hefði átt að fá sérstaka tilkynningu með innköllun kröfulýsingarinnar.

Anglo Irish Bank stefndi því Kaupþingi fyrir Héraðsdómstól Reykjavíkur til að fá kröfur sínar viðurkenndar. Úr varð að leitað yrði ráðgefandi álits EFTA dómstólsins sem komst að þeirri niðurstöðu að samkvæmt 14 grein tilskipunar 2001/24/EB skuli ákvæði landslaga ekki heimila niðurfellingu kröfu þekkts EES-lánadrottins, sem ekki hefur fengið sérstaka tilkynningu um slit lánastofnunar, jafnvel þótt innköllun vegna slitanna hafi verið birt með almennum hætti.

Á þessari stundu liggur ekkert fyrir um það hvaða áhrif þessi niðurstaða EFTA dómstólsins hefur á slitameðferð Kaupþings eða annarra banka.