Gengi Facebook hrynur

Gengi Facebook hefur hrunið í dag, og nemur lækkunin það sem af er degi tæplega 9 prósentum, samkvæmt markaðsvakt Wall Street Journal.

Facebook hækkaði um tæplega eitt prósent sama daga og það var skráð á markað, það er á föstudaginn síðastliðinn. Í dag hefur gengið hins vegar hrunið, og telja fjárfestar að þetta sýni að skráningarverðið, á bilinu 38 til 45 dalir á hlut, hafi verið alltof hátt, en það gerði ráð fyrir markaðsvirði upp á ríflega 104 milljarða dala, eða sem nemur ríflega 13 þúsund milljörðum króna.

Ýmsir höfðu efasemdir um þetta verð, en það nemur um hundraðföldum árlegum hagnaði fyrirtækisins í fyrra, sem var um einn milljarður dala, um 126 milljarðar króna.

Sjá má umfjöllun Wall Street Journal um gengi Facebook hér, en með fréttinni má meðal annars sjá skoðanakönnun þar sem lesendur eru spurðir hvar gengi Facebook endar í lok þessarar viku.