Íslenskir bankastjórar enn hafðir að háði og spotti

Financial Times hefur birt niðurstöðu sína um hver telst vera yfirborgaðasti fjármálamaður heimsins. Bankastjórar Íslensku bankanna komu sterklega til greina því þeim tókst ekki aðeins að reka banka sína í þrot heldur tóku heila þjóð með sér í fallinu.

Það er hinn virti dálkahöfundur Lex sem stóð að kosningunni. Hann segir: "Í Evrópu vildu margir lesendur að Sir Fred Goodwin myndi sigra í valinu á "Yfirborgaðasta forstjóra" ársins. Goodwin var rekinn frá Royal Bank of Scotland í október en árin 2007 og 2006 fékk hann bónus upp á hálfan annan milljarð króna. Og bankastjórar íslensku bankanna voru vinsælir þar sem þeim heppnaðist ekki bara að keyra banka sina í þrot heldur heilt land."

En að mati Lex eru þetta bara smámunir í sambandi við það sem bandarískir starfsfélagar þeirra eru með á bakinu. Nefna má forstjóra Freddie Mac og Fannie Mae. Þeir eiga öðrum fremur sök á undirmálslánunum svokölluð sem eru undirrót núverandi fjármálakreppu. Fyrir viðvikið fengu þeir samtals um 6 milljarða kr. í sinn hlut á síðasta ári.

En sá sem á titilinn öðrum fremur skilið er Richard Fuld fyrrum bankastjóri Lehman Brothers. Hann stóð í veginum fyrir sölunni á Lehman þegar tækifæri gafst og telja verður það heimskustu ákvörðun ársins. Árin 2007 og 2006 fékk Fuld tæpa 10 milljarða kr. í sinn hlut. "Það verður erfitt að toppa það á næsta ári," segir Lex.