Fær frest til þriðjudags til að bregðast við uppsögn

Gunnari Þ. Andersen, forstjóra Fjármálaeftirlitsins, hefur verið veittur viðbótarfrestur til klukkan fjögur á þriðjudaginn í næstu viku til þess að gera athugasemdir við fyrirætlanir um uppsögn hans í starfi. Þetta staðfestir Aðalsteinn Leifsson, formaður stjórnar Fjármálaeftirlitsins, í samtali við Vísi.

Gunnar fékk bréf frá stjórninni síðla föstudags í síðustu viku þar sem honum var kynntar fyrirætlanirnar. Upphaflega fékk hann frest til andmæla til mánudagsins síðasta en fresturinn var svo framlengdur til dagsins í dag. Með bréfi sem Skúli Bjarnason, lögmaður Gunnars, sendi stjórninni í gær var krafist enn lengri frests.

Þá krafðist Skúli jafnframt svara við því á hvaða nýju gögnum ákvörðun stjórnar Fjármálaeftirlitsins um að segja Gunnari upp störfum sé tekin. Aðalsteinn segir í samtali við Vísi að hann geti ekki greint frá því hvernig þeim spurningum hafi verið svarað.