Köttur kennir ritlist

Við erum bæði búin að vera að brölta eitthvað við að skrifa síðan við vorum börn, þá var maður mikið að pára niður eitthvað fyrir sjálfan sig,“ segir Atli Sigurþórsson, eða tónlistarmaðurinn Kött Grá Pjé eins og hann er yfirleitt kallaður.

„Hugmyndin er þó hundrað prósent komin frá Viktoríu Blöndal, hún er svo sniðug og frjó. Við höfðum unnið saman að óskyldu verkefni fyrir löngu, og henni datt ég í hug þegar hún fór að hugsa betur um þessa hugmynd. Ég stökk að sjálfsögðu á þetta góða tækifæri, enda finnst mér þetta frábær hugmynd.“

Ritlistarnámið guðsgjöf

Segir Atli hugmyndina um ritlistarkennslu beinast að börnum og unglingum, þótt hann reikni með að fyrst um sinn muni þau byrja á krökkum á menntaskólaaldri.

„Þetta er eitthvað sem ég sjálfur hefði haft gaman af, við hefðum bæði orðið hrifin af svona námskeiði. Ég hefði alla vega verið til í svona þegar ég var krakki. Þannig að við gerum ráð fyrir að krakkar í dag séu ekkert frábrugðnir. Krakkar eru alltaf að lifa sögur, og það getur verið svo gott að koma þeim á blað. Fyrir mér var ritlistarnámið mitt algjör guðsgjöf. Það opnaði mig alveg upp á gátt,“ segir Atli, sem viðurkennir að námið hafi haft jákvæð á hann í tónlistarsköpun hans. „Að skrifa kemur einhverri hreyfingu á það sem er að gerjast í hausnum á mér.“

Fókusera á sköpunarhliðina

Segir Atli jákvætt að þau komi úr nokkuð ólíkum áttum, en auk þess að vera í hópi vinsælustu tónlistarmanna landsins um þessar mundir, þá er hann með mastersgráðu í ritlist en Viktoría kemur hins vegar úr leikhúsgeiranum.

„Hún menntaði sig á sviðshöfundabraut frá LHÍ, þannig að hún þekkir þessar leikbókmenntir. Við erum hrifin af smiðjuforminu, og ætlum okkur að hafa þetta einhvers konar bland af framsögu, almennum skrifum, bókmenntum og svo einhverju léttu og skemmtilegu. En aðallega ætlum við fókusera á sköpunarhliðina, og aðstoða þetta unga fólk við að koma orðunum frá sér.“