Viðsnúningur til hins betra í rekstri Ísafjarðarbæjar

Verulegur viðsnúningur hefur orðið á rekstri Ísafjarðarbæjar og skilaði hann í fyrra 46 milljóna kr. afgangi en árið áður var halli á rekstrinum upp ríflega 300 milljónir kr. Skuldir voru greiddar niður um tæplega 200 milljónir kr. á sama tíma og fjárfest var fyrir rúmlega 200 milljónir kr.

Í tilkynningu segir að bærinn sé nú komin undir 150% lögbundið skuldaviðmið fyrir sveitarfélög en skv. þriggja ára áætlun bæjarins átti það að gerast á árinu 2016.

„Þessi afkoma er einkar ánægjuleg og sýnir að við erum að ná tökum á rekstrinum eftir erfið ár. Afkoma er umfram áætlanir en tekjuþróun hefur verið okkur mjög hagstæð á sama tíma og okkur hefur gengið vel að halda aftur af kostnaði. Starfsfólk bæjarins hefur lagt mikið á sig til að ná þessu fram. Bæði hafa sumir starfsmenn tekið á sig launalækkanir en eins hafa starfsmenn leitað allra leiða til að bæta reksturinn.  T.d. má nefna að tekist hefur að draga úr launakostnaði um 100 milljónir kr. á milli ára þrátt fyrir að starfsfólk hafi fengið kjarasamningsbundnar launahækkanir“, segir Daníel Jakobsson bæjarstjóri í tilkynningunni.

„Verkefni næstu ára er að mínu mati að halda áfram að greiða niður skuldir þannig að við getum mætt erfiðum árum sem munu koma, hvenær sem það verður. Jafnframt er mikilvægt að finna lausn á málefnum Fasteigna Ísafjarðarbæjar sem eiga 104 íbúðir.“