Lindex opnar nýja verslun á Akureyri

Lindex ætlar að opna nýja 470 fermetra verslun í verslunarmiðstöðinni Glerártorgi á Akureyri þann 16. ágúst næstkomandi. Samningur þess efnis hefur verið undirritaður af hálfu Eikar fasteignafélags, eiganda verslunarhúsnæðisins, og forráðamanna Lindex.

Verslunin verður staðsett í norðurhluta Glerártorgs og mun bjóða allar þrjár meginvörulínur Lindex, samkvæmt tilkynningu verslunarinnar. 

Þar segir að Lindex sé ein stærsta tískufatakeðja Norður-Evrópu með um 450 verslanir í 16 löndum. Gera má ráð fyrir að um 12 ný störf skapist hjá Lindex á Akureyri.

„Þetta er frábært næsta skref fyrir okkur en við opnuðum Lindex í Smáralind árið 2011, Lindex Kids í Kringlunni á síðasta ári og nú er komið að því að opna á Glerártorgi. Við erum þakklát fyrir hversu vel hefur tekist til með staðsetningu og hlökkum mikið til að bjóða Akureyringum og nærsveitungum upp á tískuupplifun á heimsmælikvarða,“ segja þau Lóa D. Kristjánsdóttir og Albert Þór Magnússon, umboðsaðilar Lindex á Íslandi í tilkynningunni.

Verslunarmiðstöðin Glerártorg var byggð árið 2000 og árið 2008 var ákveðið að tvöfalda verslunarrýmið sem þá fór í ríflega 20.000 fermetra. Á fjórða tug fyrirtækja hefur rými í verslunarmiðstöðinni.