Meðallaun hjá Fjarðaáli 692 þúsund á mánuði

Meðalárslaun hjá Alcoa Fjarðaáli árið 2013 voru 8,3 milljónir króna, eða tæplega 700 þúsund krónur á mánuði, samkvæmt yfirliti sem fyrirtækið hefur gefið út um reksturinn á síðasta ári. Starfsmenn Fjarðaáls voru 470, en auk þeirra unnu um 460 manns á vegum annarra fyrirtækja í álverinu eða á álverssvæðinu. Í fyrirtækinu, hjá undirverktökum og á álsverssvæðinu störfuðu því samtals um 930 manns.

Fjarðaál flutti út vörur fyrir um 95 milljarða króna í fyrra. Af útflutningstekjum urðu um 35% eftir í landinu, eða tæpir 33 milljarðar króna, meðal annars í formi opinberra gjalda, launa, innkaupa frá innlendum byrgjum á vöru og þjónustu, sem voru um 200 talsins, auk samfélagsstyrkja. Á árinu 2013 greiddi Fjarðaál 1,5 milljarða króna í opinber gjöld til ríkisins og sveitarfélagsins Fjarðabyggðar. Starfsfólk Fjarðaáls greiddi um 1,4 milljarða króna í tekjuskatt og útsvar.

Um 22% starfsmanna voru konur og 92% starfsmanna voru íslenskir ríkisborgarar. Um 91% starfsmanna áttu lögheimili í nærliggjandi byggðarlögum, þar af 55% í Fjarðabyggð og 31% á Fljótsdalshéraði. Tæp 9% starfsmanna áttu lögheimili utan Austurlands.