Spá bjartara hagkerfi

Hagdeild ASÍ spáir 3,2 prósenta hagvexti í ár, 3,4 prósenta á næsta ári og 3,5 prósenta hagvexti árið 2016. Hagspá ASÍ var kynnt á blaðamannafundi fyrr í dag. Í spánni segir þó að blikur sé á lofti og hagvöxtur sé að of miklu leyti drifinn áfram af vaxandi einkaneyslu en ekki aukinni verðmætasköpun.

Hagspána má lesa hér og tilkynningu frá ASÍ má sjá hér.

„Fjárfesting er enn nálægt sögulegu lágmarki. Áætlað er að í fyrra hafi fjárfesting verið um 13,6% af landsframleiðslu. Þetta hlutfall er um 20% hjá þeim löndum sem við viljum helst bera okkur saman við,“ segir í inngangi skýrslunnar.

Árið 2011 settu stjórnvöld og aðilar vinnumarkaðarins sér að ná hlutfallinu í 20 prósent fyrir árið 2014, en útlit er fyrir að hún verði einungis 17,8 prósent af vergri landsframleiðslu í lok árs 2016.

Þá segir að áform stjórnvalda um að lækka skuldir heimilanna muni hafa áhrif. Með þeim muni ráðstöfunartekjur og hrein eign heimila aukast og einnig hafi það áhrif á væntingar heimila.

„Allar líkur eru á því að aðgerðin leiði til aukinnar neyslu. Þrátt fyrir að umfang aðgerðarinnar sé ekki meira en aðgerða á síðasta kjörtímabili má búast við að áhrifin verði meiri á einkaneysluna.“

Búast má við að vöxtur innflutnings verði hraðari en vöxtur útflutnings og að augljós veikleikamerki séu á hagkerfinu. Þar megi nefna óvissu um framtíðarstefnu í peningamálum, gjaldeyrishöft og minni afgangur af viðskiptum við útlönd og óvissa setji þrýsting á krónuna til lækkunar sem skili sér í verðlag.

Þetta endurspeglist í spá hagdeildar ASÍ sem spáir tæplega fjögurra prósenta verðbólgu á næsta ári.