Tengsl eigenda HB Granda við hvalveiðar skiptir ekki máli

High Liner Foods segist hafa upplýsingar um að HB Grandi hafi notað vinnsluhúsnæði í eigu fyrirtækisins til vinnslu á hvalafurðum. Þær upplýsingar höfðu áhrif á ákvörðun bandaríska fyrirtækisins um að hætta viðskiptum við sjávarútvegsfyrirtækið.

Frá þessu er greint á vef mbl.is og þar birt skriflegt svar High Liner við fyrirspurn vefsins.

Í svari High Liner segir að það fari gegn stefnu fyrirtækisins að eiga viðskipti við fyrirtæki sem stundi hvalveiðar eða vinnslu á hvalafurðum. Vonast sé til þess að High Liner geti seinna stundað viðskipti við HB Granda þegar aðstæður breytist.

High Liner segir einnig að ákvörðunin sé ekki atlaga gegn hagsmunum íslensks sjávarútvegs heldur viðleitni til að standa vörð um þá. Fyrirtækið muni áfram kaupa vörur frá öðrum íslenskum framleiðendum, en High Liner kaupir frá fimmtán fyrirtækjum hér á landi, og á vörumerkið Icelandic Seafood í Norður-Ameríku.