Flugeldafélag Arnar Árnasonar á hausinn

Flugeldafélagið Bomba.is ehf. var úrskurðað gjaldþrota 4. júlí síðastliðinn, samkvæmt Lögbirtingarblaðinu. Félagið var í helmingseigu leikarans Arnar Árnasonar, sem hefur selt flugelda um árabil.

Bomba.is var stofnað árið 2005 og sérhæfði sig í stórum og viðamiklum flugeldatertum.

Örn segir að stóran þátt í þroti félagsins megi rekja til ársins 2011. Það ár varð Bomba.is fyrir verulegu tjóni eftir að félagið þurfti að innkalla tvær tegundir af stórum flugeldatertum vegna framleiðslugalla.

„Sumar terturnar sprungu í heilu lagi. Við þorðum að sjálfsögðu ekki að taka áhættuna á manntjóni þannig við ákváðum að innkalla allar terturnar til öryggis og endurgreiða fólki,“ segir Örn en tap félagsins nam 1,4 milljónum árið 2011.

Örn og Arnar Barðdal, hinn eigandi félagsins, fengu tjón sitt ekki bætt þar sem þeir sem seldu þeim terturnar frá Kína viðurkenndu ekki gallann.

„Kínversku söluaðilarnir kenndu skipafélaginu um gallann og sögðu að terturnar hlytu að hafa eyðilagst við flutninginn,“ segir Örn en félagið var ekki nægilega vel tryggt. „Svona tryggingar eru svakalega dýrar og það má segja að áhættan hafi ekki borgað sig,“ útskýrir Örn.

Samkvæmt ársreikningi félagsins fyrir síðasta ár nam tapið þó ekki nema rúmum 100 þúsund krónum. „Við náðum að vinna þetta aðeins upp á síðasta ári en svona vörur eru afar dýrar í innflutningi og því má ekki mikið út af bregða,“ segir Örn og bætir við ekki borgi sig lengur að halda uppi svona rekstri. „Þetta er árstíðabundinn rekstur og það voru hreinlega ekki til peningar á þessu augnabliki til að bjarga honum.“

Örn segist alltaf hafa haft gaman af flugeldum. „Ég leyfði mér að safna saman þeim peningum sem eiga að teljast til nautna og leggja í rekstur af þessu tagi, þar sem ég reyki ekki og drekk afar hóflega,“ segir Örn, sem þykir leitt hvernig fór. „Ætli ég byrji ekki bara að drekka núna í staðinn,“ bætir hann við og hlær.