Fjármálaráðherra segir að vanda þurfi tímasetningu á sölu bankanna

Bjarni Benediktsson fjármálaráðherra segir að það hljóti að koma til skoðunar á næstu árum að ríkissjóður selji eignir til að rétta af stöðu ríkissjóðs. Engar virkar viðræður séu hins vegar í gangi um sölu á eignarhlut ríkisins í Arion banka og Íslandsbanka, hvað þá í Landsbankanum sem ríkið á nánast að fullu. En nokkur umræða hefur verið um sölu bankanna að undanförnu.

"Hins vegar er ég sammála því að það er eitt af því sem hlýtur að koma til skoðunar á næstu árum þegar við erum að vinna að því að lækka skuldabyrði ríkisins, að selja eignir. Og hlutur ríkisins í fjármálafyrirtækjunum Arion banka og Íslandsbanka sérstaklega þar sem ríkið er með lítinn hlut hlýtur að koma til skoðunar. Ég teldi mjög skynsamlegt fyrir ríkið að losa um þann eignahlut og selja hann," segir fjármálaráðherra.

"En það þarf að tímasetja svona sölu vel, þannig að við fáum hámarksverð," segir Bjarni Benediktsson.