Greining spáir 2,4% verðbólgu í desember

Greiningardeild Arion banka spáir 0,3% hækkun vísitölu neysluverðs (VNV) í desember. Gangi spáin eftir mun tólf mánaða verðbólga fara lítillega undir verðbólgumarkmið Seðlabankans og mælast 2,4%.

Fjallað er um málið í Markaðspunktum greiningarinnar. Hvað helstu þætti í spánni varðar segir að í desember mun eldsneytisverð hafa um +0,2% áhrif til hækkunar vísitölu neysluverðs . Ástæða hækkunar má að hluta til rekja til hækkunar á heimsmarkaðsverði á hráolíu ásamt því sem dollar hefur styrkst.

Hinsvegar hefur eldsneytisverð hækkað meira hér heima en verðþróun ytra gefur e.t.v. tilefni til - sem er vísbending um aukna álagningu olíufélaganna á árinu.

Lækkun flugfargjalda gengur tilbaka. Flugfargjöld lækkuðu í nóvember og gerir greiningin ráð fyrir að sú lækkun gangi tilbaka í desember, líkt og verið hefur síðustu árin.

Þá er gert ráð fyrir lítilsháttar hækkun húsnæðisliðar í spánni, eingöngu vegna þess að áhrif októbermælingarinnar hafa ennþá áhrif. Hinsvegar lækkaði verð á viðhaldi húsnæðis í nóvember og útilokar greiningin ekki frekari lækkanir í þessum mánuði.

Eins og áður hefur verið bent á er húsnæðisliðurinn stór óvissuþáttur í verðbólguspá okkar enda sveiflukenndur liður og oft erfitt að meta áhrif húsnæðisliðar út frá mánaðarmælingu fasteignavísitölu FMR og Hagstofunnar þar sem sambandið þar á milli er frekar ófullkomið.

Hvað aðra þætti varðar segir að viðhald vegna húsnæðis lækkaði í nóvember og hugsanlega gætu frekari lækkanir einnig komið fram í desember. Greiningin gerir ekki ráð fyrir að aðrir liðir breytist mikið í mánuðinum.