Krísufundur vegna Mosley

Max Mosley hefur farið fram á sérstakan krísufund hjá Alþjóða Akstursíþróttasambandinu í kjölfar alvarlegra ásakana sem hann hefur verið borinn í fjölmiðlum að undanförnu.

Mosley, sem er yfirmaður sambandsins, á undir högg að sækja eftir að breska blaðið News of the World greindi frá því um helgina að hann hefði tekið þátt í kynlífssvalli með nasistaþema með fimm vændiskonum.

Fundurinn fer væntanlega fram í París og verður honum komið á eins fljótt og mögulegt er eftir því sem kemur fram í yfirlýsingu frá Akstursíþróttasambandinu.

Mosley sagði sjálfur í yfirlýsingu í gær að hann ætlaði að halda áfram hjá FIA enda hafi hann hlotið stuðning víða að til þess.

Nú virðist hins vegar síaukinn þrýstingur að hann láti af störfum. BMW og Mercedes sendu frá sér sameiginlega yfirlýsingu þar sem þeir sögðu hegðun Mosley honum til háborinnar skannar.

Honda og Toyota tóku í svipaðan streng.

Mosley hefur svarað og sagðist bera fullan skilning á viðbrögðum BMW og Mercedes-Benz, sér í lagi í ljósi sögu fyrirtækjanna á millistríðsárunum.

„Hins vegar höfðu þau ekki samband við mig áður en þau gáfu frá sér yfirlýsinguna og spurðu hvort að ásakanir væru sannar," sagði Mosley en hann hefur áður neitað því að neitt nasistalegt hafi átt sér stað í áðurnefndu svalli.