Stefna á útrás bókhaldsforrits

Fyrirtækið Regla hefur síðastliðin tvö ár prufukeyrt samnefnt bókhaldskerfi fyrir lítil og meðalstór fyrirtæki á netinu. Stefnt er að því að markaðssetja það erlendis á næstu mánuðum. Þetta er íslensk nýsmíði frá grunni, sem fór í gang af fullum krafti eftir bankahrunið 2008.

Kjartan Ólafsson, framkvæmdastjóri Reglu, telur fyrirtækið eiga mikla möguleika ytra. Viðræður hafa staðið yfir við helsta ráðgjafa Breta í þessum málum um markaðssetningu þar og lofa þær góðu. „Margir stefna á þennan markað, en við höfum nokkurra mánaða forskot,“ segir Kjartan og bendir á að fyrirtækið hafi notað bókhaldsbúnaðinn í ýmsum myndum í þrjú ár auk þess sem tuttugu til þrjátíu fyrirtæki hafi sömuleiðis prufukeyrt það. „Við höfum náð að minnka bókhaldstengda vinnu um rúman helming,“ segir hann.

Hugbúnaðurinn er miðlægur á netinu og notkun hans keypt í áskrift. Notendur losna bæði við rekstur eigin tölvukerfa og dýran hugbúnað.

„Við höfum sagt bæði í gríni og alvöru að þetta sé bókhald sem færir sig að miklu leyti sjálft,“ segir Kjartan en möguleiki er á að hringja inn færslur í bókhaldskerfið með farsíma. - jab