Arev eignast rekstur Next á Íslandi

Einkafjármagnssjóðurinn Arev NI slhf. sem er í meirihlutaeigu Jóns Scheving Thorsteinsson, eignaðist að fullu tískuvöruverslunina Next hér á landi í október. Next rekur eina verslun í Kringlunni á 1.500 fermetrum að ótöldum lager og skrifstofu.

Haraldur Bergsson, nýráðinn framkvæmdastjóri Next, segir nóg að gera. „Við höfum verið að taka á móti stórum sendingum og fáum eina af þeim stærstu í næstu viku. Við erum að fylla búðina og stefnum á að eiga hér mjög góð jól enda góð blanda verðs og vöruúrvals um þessi jól.“ Haraldur segir reksturinn ganga ágætlega og móðurfélagið, Dagsól, skulda lítið. Arev lagði nýtt fé í reksturinn við kaupin.

Sverrir Berg Steinarsson og Ragnheiður Anna Jónsdóttir stofnuðu Next á Íslandi og áttu verslunina upphaflega í gegnum Nordex, dótturfélag Árdegis. Félagið varð gjaldþrota í kringum bankahrunið fyrir tveimur árum. Arev keypti Next úr þrotabúi Nordex og seldi þeim Sverri og Ragnheiði minnihluta í desember 2008.- jab