Gerir ráð fyrir að eiga 1.100 íbúðir í árslok

Íbúðalánasjóður yfirtók 537 íbúðir fyrstu átta mánuði ársins og átti samtals 822 íbúðir hinn 1. september síðastliðinn. Áætlanir sjóðsins gera ráð fyrir að hann muni eiga um 1.100 íbúðir í lok þessa árs.

Þetta kemur fram í svari félagsmálaráðherra við fyrirspurn Guðlaugs Þórs Þórðar­sonar alþingismanns sem lögð var fram á Alþingi í gær.

Fram kemur að sjóðurinn áætlar að fyrirhugað kaupleigukerfi dragi úr uppsöfnun íbúða í eigu sjóðsins. Þannig fækki íbúðum í eigu hans um rúmlega tvö hundruð á næsta ári og um rúmlega eitt hundrað til viðbótar árið 2012. Því verði 765 íbúðir í eigu Íbúðalánasjóðs í lok ársins 2012.

- pg