Spónn fyrir íslenskan landbúnað

Endurvinnslan Fengur ehf. áætlar að framleiða 3-4 þúsund tonn af spóni á ári fyrir íslenskan landbúnað. Við endurvinnsluna er hrein orka, jarðgufa, notuð við framleiðsluna. Þá er verið að búa til vöru úr endurvinnanlegu hráefni, með því að nýta timbur sem áður var að mestu urðað í jörðu eða notað til brennslu í stóriðjum, að því er segir í tilkynningu.

Spónninn er notaður til undirburðar fyrir hesta og annan búfénað hér á landi, en í dag nemur innflutningur á undirburði 300-500 milljónum króna á ári.

Endurvinnslan er til húsa í Hveragerði þar sem áhersla er lögð á vistvæna orkugjafa til framleiðslunnar, eins og jarðgufuna. Nú þegar hafa skapast nokkur ný störf og vonir standa til að þeim fjölgi í allt að tíu á næstu misserum.

Töluvert magn af vörubrettum og öðru timbri fellur til hérlendis á hverju ári. Fengur hyggst endurnýta timbur í auknum mæli. Timbrið býður einnig upp á mikla möguleika á framleiðslu á fleiri vörum.

Fengur ehf. hyggur á frekari vöruþróun, að því er segir í tilkynningu.

Fengur ehf. var stofnað árið 2009 af Sigurði G. Halldórssyni.