Bilun olli rangt skráðu gengi hjá Byr

Vegna bilunar í kerfum Reuters í Bretlandi var gengi gjaldmiðla ranglega skráð á vef Byrs sparisjóðs. Sú misskráning átti einnig við vefi annarra sparisjóða í landinu.

Meðan unnið var að lausn mála gátu viðskiptavinir hvorki keypt né selt gjaldeyri. Búið er að lagfæra bilunina ytra og því hefur verið opnað á nýjan leik fyrir gjaldeyrisviðskipti.

Byr harmar þau óþægindi sem bilunin kann að hafa valdið viðskiptavinum og biðst velvirðinar á misskráningu gengis.

Fram kom í frétt á visir.is fyrr í dag að Byr væri með langhæsta skráða gengið á evrunni af bönkum landsins. Var það vegna framangreindrar bilunar. Er gengi Byr nú komið í samræmi við gengi hinna bankanna eða tæplega 160 kr..