Árvökull Akureyringur segir AB varahluti svipta neytendur rétti sínum til að taka upplýsta ákvörðun við kaup með auglýsingum sínum um vörur á tilboði. Verkfæraskápar eru auglýstir með miklum afslætti en athygli vekur að afslátturinn er af verði sem er mun hærra en skáparnir kostuðu nýlega í versluninni.

Neytendur og verslanir bíða mörg hver í ofvæni eftir komandi föstudegi, hinum svonefnda Svarta föstudegi þar sem neytendur eiga að geta gert kjarakaup í anda „Black Friday“ í Bandaríkjunum, dagsins eftir Þakkagjörðahátíðina.

Arnar Einarsson, viðskipafræðingur á Akureyri, vekur athygli á því á Facebook-síðunni „Vertu á verði - eftirlit með verðlagi“ að AB varahlutir auglýsi verkfæraskáp til sölu með 50% afslætti. Hann kostar nú 244.940 krónur á vefsíðu verslunarinnar sem er 50% af uppsettu verði, 489.879 krónum. „Black Friday forpöntun aðeins!“ stendur með auglýsingunni á vef AB varahluta.

„Til ykkar allra sem ætla að reyna að gera góð kaup á „Black Friday“ eða álíka útsölu, ekki trúa „fullu verði“ í hálfa sekúndu,“ segir Arnar.

Hins vegar var uppsett verð á þessum skáp 387.832 krónur fyrir helgi en var þá til sölu með um 20% afslætti.

„Elska, elska, elska hvað íslenskar verslanir eru heiðarlegar,“ segir Arnar með færslu sinni.

Hann bendir á annað svipað dæmi þar sem önnur tegund af verkfæraskáp er auglýstur til sölu með rúmlega 30% afslætti. Kostar nú með afslætti 289.990 krónur en uppsett verð sé 455.073 krónur. Hins vegar var uppsett verð á sama verkfæraskáp nýlega 289.990 krónur.

Í lögum um eftirlit með viðskiptaháttum og markaðssetningu segir um útsölur og tilboð að óheimilt sé að auglýsa eða tilkynna útsölu þar sem selt er á lækkuðu verði nema um raunverulega verðlækkun sé að ræða. Tilgangurinn með lagagreininni er að koma í veg fyrir að neytendur séu blekktir og að þeir geti áttað sig á verðmuninum.

Arnar segist í samtali við Vísi hafa fengið þau svör hjá þjónustufulltrúa AB varahluta á Facebook að í öðru tilfellinu hefði innkaupsverð á skápnum skyndilega hækkað en í hinu hefði fyrra verð verið tilboðsverð. 

Segir enga tilraun til blekkingar

Loftur Guðni Matthíasson, framkvæmdastjóri AB varahluta, segir enga tilraun gerða til að blekkja neytendur. Fyrirtækið sé með 29 þúsund vörur á skrá og ætli að bjóða upp á frábær verð í kringum svartan föstudag.

Hann segir Audi limited verkfæraskápinn hafa verið á tilboði á síðunni á 289.990 krónur. Upphaflega verðið hafi hreinlega ekki verið sýnilegt á heimasíðunni. Við uppfærslu á vefnum í tengslum við útsöluna hafi upphaflega verðinu verið bætt inn svo þetta líti illa út. Eftir ábendingar í morgun hafi svo verðið verið lækkað enn meira og skápurinn kosti í kringum 250 þúsund krónur.

„Ef þetta væri lagervara myndi ég skilja áhyggjurnar. En það eru tveir skápar eftir og bara verið að reyna að losa þá,“ segir Loftur.

Hvað hinn skápinn varði þá sé um sérpöntun að ræða. Varan hafi komið til AB varahluta á sínum tíma á tilboðsverði að utan. Nú hafi komið ný sending þar sem varan kostaði mun meira við innkaup. Engu að síður sé hún á miklum afslætti eins og fjöldi annarra hluta í þessari viku.

Fréttin hefur verið uppfærð.