Jól

Æðislegur fylltur lambahryggur

Elín Albertsdóttir skrifar
Eva Laufey framkallar hér frábæran veislumat sem hægt er að dúlla sér við um jólin.
Eva Laufey framkallar hér frábæran veislumat sem hægt er að dúlla sér við um jólin.
Eva Laufey Kjaran Hermannsdóttir sjónvarpskokkur lét okkur í té þessa girnilegu uppskrift að jóla-lambahrygg en hann er borinn fram með ofnbökuðum kartöflum og soðsósu.



Eva Laufey segir að lambahryggurinn sé fylltur með sólkysstum tómötum, furuhnetum, ólífumauki, steinselju og sítrónuberki og sé afar ljúffeng steik sem passar einstaklega vel á veisluborðið um jólin. „Með hryggnum er gott að hafa ofnbakaðar kartöflur í andafitu og auðvitað góða soðsósu, fullkomið fyrir þá sem vilja nostra aðeins við matargerðina og njóta í botn," segir Eva Laufey sem sífellt kemur áhorfendum á óvart í skemmtlegri matargerð. Hráefnið í þessa uppskrift bendir til að hér sé æðisleg uppskrift.

Fylltur lambahryggur sem minnir á sól og sumar við Miðjarðarhafið.
Fylltur lambahryggur með tómat- og furuhnetupestói



Fyrir 4-6



1 lambahryggur um 2,5 kg úrbeinaður



Fylling



1 krukka sólkysstir tómatar



3 msk. ólífutapenade



70 g ristaðar furuhnetur



½ laukur



2 hvítlauksrif



1 msk. fersk steinselja



Salt og nýmalaður pipar



1 msk. jómfrúarolía



Börkur af hálfri sítrónu



2 tsk. smátt saxað rósmarín



½ l vatn



Grænmeti



2 laukar



4 hvítlaukar, heilir



4-6 gulrætur



Biðjið starfsmann í kjötversluninni að úrbeina lambahrygginn ef þið treystið ykkur ekki sjálf til þess. Setjið öll hráefnin sem eiga að fara i fyllinguna í matvinnsluvél og maukið vel. Setjið fyllinguna á milli hryggjarvöðvanna og leggið lundirnar þar ofan á. Mótið rúllu og vefjið seglgarni utan um rúlluna og kryddið hrygginn með salti, pipar og sítrónuberki. Saxið einnig niður ferskt rósmarín og sáldrið yfir. Skerið grænmetið í grófa bita og leggið í eldfast mót, setjið lambahrygginn yfir og hellið hálfum lítra af soðnu vatni í fatið og inn í ofn við 180°C í 45-50 mínútur. Þegar 15 mínútur eru eftir af eldunartímanum er ágætt að hækka hitann í 200-210°C. Leyfið kjötinu að hvíla í 10 mínútur áður en þið skerið það og berið fram, hellið soðinu frá og geymið fyrir sósugerð.



Ofnbakaðar kartöflur í andafitu



10-15 kartöflur að eigin vali



2-3 msk. andafita



4-5 hvítlauksrif



3-4 rósmaríngreinar



Afhýðið kartöflurnar og sjóðið í vel söltu vatni í 10 mínútur. Eftir þann tíma takið þær upp úr pottinum og leggið í eldfast mót.

Skerið niður hvítlauksrif og saxið ferskt rósmarín. Setjið 2 msk. af andafitu í formið og veltið kartöflunum upp úr fitunni. Kryddið til með salti og pipar. Bakið í ofni við 180°C í 30 – 35 mínútur eða þar til kartöflurnar eru gullinbrúnar, það er gott ráð að snúa þeim við endrum og eins.



Soðsósa



300-400 ml soð



½ nautakraftsteningur



Salt og pipar



500 ml rjómi



2 tsk. hveiti



1 msk. olía



Sigtið soðið í pott og blandið nautakraftsteningi og rjóma saman við. Kryddið til með salti og pipar. Leyfið sósunni að ná suðu og hrærið vel í á meðan. Blandið saman í skál hveiti og olíu og þykkið sósuna með hveitiblöndunni. Berið strax fram með kjötinu.






Velkomin á Vísi. Þessi vefur notar vafrakökur. Sjá nánar.