Njarðvíkingar bæta við sig Bandaríkjamanni með breskt ríkisfang

Körfuknattleiksdeild Njarðvíkur hefur samið Kyle Williams, Bandaríkjamann með breskt ríkisfang.

Williams, sem er 24 ára, lék með Newcastle Eagles á Englandi á síðasta tímabili. Þar var hann með rúm 13 stig að meðaltali í leik.

Hinn 1,93 metra hái Williams getur leyst ýmsar stöður á vellinum. Hann er kominn til Njarðvíkur og mætir á sína fyrstu æfingu með liðinu í kvöld.

Williams kemur væntanlega til með að fylla skarð litháíska leikstjórnandans Evaldas Zabas sem var sendur heim í síðustu viku.

Njarðvík hefur tapað þremur af fyrstu fjórum leikjum sínum í Domino's deildinni. Næsti leikur liðsins er gegn Stjörnunni á föstudaginn.