Lífið

Séra Davíð Þór segist víst hafa gift sig í kirkju

Sylvía Rut Sigfúsdóttir skrifar
Davíð Þór Jónsson er prestur í Laugarneskirkju.
Davíð Þór Jónsson er prestur í Laugarneskirkju. Fréttablaðið/Valli

 „Ég er bara kominn í vinnuna núna, sit á skrifstofunni og er að undirbúa vinnuvikuna,“ segir séra Davíð Þór Jónsson í samtali við Vísi. Sagt var frá því í Fréttablaðinu í dag að Davíð Þór hefði gift sig á laugardag og væri nú staddur í brúðkaupsferð í Frakklandi. 

„Það var aðeins sagt vitlaust frá því. Við fórum alls ekki í neina brúðkaupsferð til Frakklands,“ segir Davíð Þór og hlær. Davíð Þór og Þórunn Gréta Sigurðardóttir formaður Tónskáldafélags Íslands giftu sig á laugardaginn og gistu svo tvær nætur á Hótel Búðum eftir brúðkaupið. Nú eru þau komin aftur í vinnuna og hversdagsleikinn tekinn við á ný.

„Ég setti það á Facebook og af einhverjum ástæðum virðist Facebook hafa haldið að Hótel Búðir væru í Frakklandi. Það stendur á Facebook, Hótel Búðir í Reims, France. Mjög skrítið og blaðamaðurinn hefur ákveðið að ég væri á Hótel Búðum í Frakklandi eða bara ekki pælt meira í því.“

Davíð Þór segir að það hljómi vissulega vel að fara í brúðkaupsferð í Frakklands, en þau völdu hins vegar að fara á Hótel Búðir hér á landi. Skjáskot/Facebook

Giftu sig ekki hjá sýslumanni

Sögusagnir fóru á flug um helgina að parið hafi valið að gifta sig hjá sýslumanni en ekki í kirkju. Hann prestur og hún fyrrum messuþjónn og organisti í kirkju. Saga sem kom mörgum spánskt fyrir sjónir.

„Það þykir mjög fyndið, sú saga er náttúrulega miklu betri. En nei það er alveg úr lausu lofti gripið, það er bara eitthvað sem einhverjum hefur þótt fyndið,“ svarar Davíð Þór aðspurður hvort þetta sé satt. Hann segir að Séra Hjalti Jón Sverrisson samstarfsmaður hans hafi gefið þau saman í Laugarneskirkju, þar sem Davíð Þór er prestur.

„Við erum búin að vera saman í 14 ár og eigum tvö börn svo það kom í sjálfum sér engum á óvart að við létum verða af því að gifta okkur. Að vissu leyti ætluðum við að vera löngu búin að því, það var einhvern vegin aldrei rétti tíminn til þess en við létum verða af því núna. Við buðum bara allra nánustu ættingjum í kaffiboð heima hjá okkur.“

Davíð Þór og Þórunn eiga saman tvö börn en fyrir átti Davíð þrjú uppkomin börn og fjögur barnabörn. Í kringum 30 gestir glöddust með brúðhjónunum á stóra daginn. Davíð Þór segir að þau hafi verið saman svo lengi að í hreinskilni finni hann ekki mikinn mun á sambandinu eða þeirra samskiptum eftir að þau urðu hjón.

„Eftir 14 ár er maður farinn að þekkjast nokkuð vel en það má segja náttúrulega að í þeirri stöðu sem við erum er bara ákveðið ábyrgðarleysi að vera ekki búin að þessu, bara svona gagnvart lögum og rétti.“
Hjónin voru mjög ánægð með daginn sinn og hvernig þau ákváðu að fagna þessu.  

„Við ákváðum að úr því að við vorum að fara að gera þetta, að gera þá svolítið úr því, nota þetta sem tilefni til þess að gera sér glaðan dag, fá fólkið sitt til sín.“


Tengdar fréttir

Predikaði köngulær gegn guðfræði Pence

Séra Davíð Þór Jónsson, sóknarprestur í Laugarneskirkju dró regnboga­fánann að húni við kirkjuna á meðan Pence fundaði með helstu ráðamönnum þjóðarinnar rétt utan við sóknarmörkin, eins og hann orðaði það í sunnudagspredikun sem hverfðist um mannlega reisn.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.