Þór Þorlákshöfn semur við Bandaríkjamann

Bandaríski körfuboltamaðurinn Vincent Bailey mun leika með ÞorlákshafnarÞórsurum í Dominos deild karla á komandi leiktíð.

Karfan.is greinir frá þessu.

Vincent þessi er 28 ára gamall, 198 sentimetrar á hæð og leikur í stöðu framherja.

Hann lék í efstu deildinni í Sviss á síðustu leiktíð þar sem hann skilaði 16,5 stigum að meðaltali í leik auk þess að taka 6,3 fráköst að meðaltali.

Hann hefur farið víða á ferli sínum og meðal annars leikið í Þýskalandi, Frakklandi, Belgíu og Lúxemborg.

Þór Þorlákshöfn hefur keppni í Dominos deildinni þann 4.október næstkomandi þegar Stjarnan kemur í heimsókn.