Veiðin ekki búin í Elliðavatni

Einhverra hluta vegna snarfækkar veiðimönnum við vötnin á láglendinu á þessum tíma en málið er að þetta er oft mjög gjöfull árstími fyrir vatnaveiði.

Sum vötn eiga það til að sofna á þessum tíma og þar má t.d. nefna Þingvallavatn en bleikjan tekur yfirleitt mjög illa núna enda er hún að hrygna. Þingvallavatn telst enda ekki til vatna á láglendi en í nágrenni höfuðborgarinnar er vatn sem margir virðast bara gleyma svona siðsumars.

Veiðin í Elliðavatni getur nefnilega oft verið glettilega góð og yfirleitt bara betri en yfir bjartasta tíma ársins. Sólríkir og bjartir dagar verða seint taldir til bestu skilyrða í vatninu sem er grunnt en kvöldrökkur, það er klárlega málið.

Urriðinn tekur langsamlega best flugur síðsumars og það eru nokkrir staðir þar sem þú sérð boðaföllin á stilltu kvöldi þegar hann eltir hornsíli og smábleikju á grunni vatni. Bleikjan í vatninu er aftur á móti að safnast saman á nokkrum stöðum og það eru blettir í til dæmis Helluvatni sem eru mjög gjöfulir. Það er ekkert nýtt að bleikjan leiti inn í Helluvatn síðsumars, hún hrygnir í vatninu og það er einmitt á þessum tíma sem hún getur verið að taka vel. Aðrir staðir sem hafa reynst undirrituðum vel á haustinn er t.d. Riðhóll/bleikjutangi, hólminn miðja leið frá Elliðavatnsbænum að Riðhól og ysta táin við Þingnesið en þar er líka oft fín urriðaveiði á haustin. Það er síðan alltaf smá bónus í ljósaskiptunum á þessum tíma en stóri urriðinn á það til að stökkva í vatninu og það er ansi mögnuð sjón og þá sérðu fyrst hvað þetta vatn geymir væna urriða.