Icelandair hafnar tengslum við vildarpunktasíðu

Flugfélagið Icelandair er með engum hætti tengt vefsíðunni vildarpunktar.com. Þar býðst notendum að selja vildarpunkta sína í skiptum fyrir peninga. Þetta kemur fram í svari Ásdísar Pétursdóttur, upplýsingafulltrúa Icelandair, við fyrirspurn fréttastofu um síðuna.

Flugfélagið hefur þegar óskað eftir því að vefsíðunni verði lokað, en á síðunn má bæði sjá myndmerki félagsins og orðið „vildarpunktar.“ Bæði eru skráð vörumerki í eigu Icelandair.

Þá segir einnig í svari Ásdísar til Vísis að þó að félagið heimili viðskiptavinum sínum að millifæra vildarpunkta á fjölskyldumeðlimi og vini, þá sé ekki ætlast til þess að fólk eigi viðskipti með punktana í atvinnuskyni. Icelandair skerpir nú á skilmálum sínum hvað það varðar.