Veiði

Veiðin komin í gang á heiðunum

Karl Lúðvíksson skrifar
Það opnar innan fárra daga í Veiðivötnum
Það opnar innan fárra daga í Veiðivötnum Mynd úr safni

Laxveiðimenn eru langt frá því að vera kátir þessa dagana með vatnið í dragánum og tökuleysis samfara því en silungsveiðimenn brosa út í eitt.

Það er nokkurn veginn sama hvert litið er, fréttir af góðri silungsveiði berast okkur daglega. Vötnin á láglendinu eru komin inn fyrir nokkrum vikum og það stefnir í aldeilis góðann júnímánuð ef þetta heldur svona áfram.

Heiðarnar eru líka að koma sterkar inn og við erum að fá góðar fréttir ofan af Arnarvatnsheiði og Skagaheiði. Þar hafa veiðimenn gert mjög fína daga en veiðin hefði oft á tíðum getað verið mun meiri ef ekki hefði komið til mikið rok suma dagana. Fyrir utan Arnarvatnsheiðina og Skagaheiði erum við líka að fá ágætar fréttir af t.d. vatnasvæði Lýsu, vötnunum á Melrakkasléttu, Hraunsfirði, Sléttuhlíðarvatni, Sauðlauksvatni bara svo nokkur vötn séu nefnd. Nú þegar það sýnist stefna í alvarlegasta vatnsleysi í dragánum í laxveiðinni er ekki úr því skotið að sumrinu verði líklega bjargað með silungsveiði og erum við með endalaust af vötnum þar sem nóg er af fallegri bleikju og urriða.

Þeir sem elska vatnaveiðina bíða líklega margir eftir opnun Veiðivatna en þar eru aðeins nokkrir dagar í að tekið verði á móti veiðimönnum. Það verður spennandi að sjá hvernig fyrstu dagarnir þar fara í gang en veiðin í öðrum vötnum á hálendinu utan veiðivatna hefur nefnilega verið góð.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.