Innlent

Hundrað ára boðið í veislu með Guðna forseta

Kolbeinn Tumi Daðason skrifar
Sigríður Kristín Sigurðardóttir fagnar 100 ára afmæli þann 5. desember. Hún tók þátt í Kvennahlaupi á Hrafnistu í dag en Kvennahlaupið sjálft fer fram á morgun.
Sigríður Kristín Sigurðardóttir fagnar 100 ára afmæli þann 5. desember. Hún tók þátt í Kvennahlaupi á Hrafnistu í dag en Kvennahlaupið sjálft fer fram á morgun. Vísir/Friðrik Þór

Hrafnista býður landsmönnum, sem eiga 100 ára afmæli á árinu, til afmælisveislu á Hrafnistu í Hafnarfirði þriðjudaginn 18. júní klukkan 14. Viðstödd veisluna verða meðal annars Guðni Th. Jóhannesson, forseti Íslands, sem flytur ávarp auk Dagnýjar Erlu Gunnarsdóttur, sem er fimmtán ára og sitja mun þingfund ungmenna í Alþingishúsinu á þjóðhátíðardaginn 17. júní í tilefni af 75 ára afmælis lýðveldisins.

Boðið verður upp á afmælisköku og söngatriði sem tenórsöngvarinn Gissur Páll Gissurarson annast. Formleg dagskrá mun taka um eina klukkustund. Auk ofangreindra og fleiri aðila er öllum íbúum Hrafnistu í Hafnarfirði boðið til veislunnar.

25 Íslendingar fagna 100 ára afmæli á þessu ári. Átján konur og sjö karlar. Flest eru afmælisbörnin búsett á höfuðborgarsvæðinu og hafa um tíu þeirra þegar boðað komu sína til veislunnar. Í lok dagskrár verður tekin hópmynd af þessum merkilega hópi ásamt forseta Íslands.

Þetta er í fyrsta sinn sem Hrafnista býður landsmönnum til 100 ára afmælisveislu ásamt forseta Íslands og er ætlunin að þetta verði árlegur viðburður. Hefur undirbúningur m.a. verið unninn í samstarfi vð Jónas Ragnarsson sem allt frá árinu 2006 hefur haldið úti vefsíðu um langlífa Íslendinga, haldgóð hjónabönd, stóra systkinahópa og fleira. Þessi áhugaverði vettvangur Jónasar er nú vistaður á síðunni Langlífi á Facebook.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.