Veiði

Köld en ágæt byrjun í Veiðivötnum

Karl Lúðvíksson skrifar
Atli Bergman með fallegan urriða úr Veiðivötnum
Atli Bergman með fallegan urriða úr Veiðivötnum Mynd: Atli Bergman
70 sm urriðinn sem Atli Bergman fékk í Veiðivötnum í gær Mynd: Atli Bergman

Veiði er hafin í Veiðivötnum á Landmannaafrétt og eins og venjulega er mikil spenna eftir fyrstu fregnum af veiði úr vötnunum.

Veiðivísir á nokkra vini sem eru staddir þar við veiðar þessa stundina og þar á meðal er Atli Bergman sem er einn af bestu silungsveiðimönnum landsins. Atli gerði sér lítið fyrir og landaði 8 punda urriða sem var mældur 70 sm langur á Black Ghost og sagði hann í samtali við Veiðivísi að þetta hafi verið hörkubarátta.

Veiðin hefur að sögn Atla verið ágæt hjá flestum en það er búið að vera ansi kalt og til að mynda var grátt í fjöllum í morgun og lofthiti ekki nema nokkrar gráður. Urriðinn virðist koma afskaplega vel undan vetri og þeir sem hafa verið að veiðast verið þykkir. Bleikjan hefur líka greinilega haft nóg æti en veiðimenn sem við höfum heyrt í sem voru staddir við Snjóölduvatn segja bleikjuna mjög fallega en tökurnar afskaplega grannar. Það er greinilega allt komið í gang í Veiðivötnum og við komum til með að fylgjast vel með veiðinni þar í sumar.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.